दुई महिनाभित्र गरिनुपर्ने पार्टीका केन्द्रिय पदाधिकारीको मनोनयन २६ महिना बितिसक्दा पनि पूर्ति गर्न नसकेकोमा आलोचित बनेका काङ्ग्रेस सभापति शेरबहादुर देउवाले आजको बैठकमा पदाधिकारीहरूको नाम प्रस्ताव गर्ने अनुमान गरिएको थियो । खुमबहादुर खड्काको निधनपछि उपसभापतिमा आफ्नो चाहनामुताविक गर्न उनलाई बाटो खुलेकोले अब देउवाले पदाधिकारी चयनमा ढिलाई गर्ने छैनन् भन्ने विश्लेषणमा दम पनि थियो ।
तर, फोरम लोकतान्त्रिक सञ्चालन गरी बसेका विजय गच्छदारलाई चुनावको मुखमा देउवाले पार्टीमा भित्र्याएका (प्रलोभन दिएर फिर्ता ल्याएका) थिए । गच्छदारजस्ता पदलोलुपलाई देउवाले सहजै कसरी काङ्ग्रेसमा फिर्ता ल्याए भन्ने चर्चा त्यतिबेलै चलेको थियो । अहिले आएर त्यसको रहश्य उजागर भयो– काङ्ग्रेसको उपसभापति बनाइदिने भनी विजयलाई फकाएका रहेछन् देउवाले । यही आश्वासन देउवाका निम्ति यतिबेला घाँडो बन्न पुगेको छ ।
हुन त पार्टीका नेता–कार्यकर्ता जोसुकैलाई आफ्नो आवश्यकता हेरेर जथाभावी आश्वासन दिने र त्यसलाई पालना नगर्ने नेताका रूपमा देउवा बदनाम भइसकेका छन् । तथापि, उनले देखाउने ललिपपको मोहमा परेर लोभिनेको लर्को कायमै छ । यही भुलभुलैयामा फस्न पुगेका छन् आफूलाई निकै वरिष्ठ मान्ने गच्छदार पनि । देउवा विजयलाई होइन मधेसकै विमलेन्द्र निधिलाई उपसभापति बनाउन चाहन्छन् भन्ने आमचर्चा छ ।
तर, लिनेलाई भन्दा दिनेलाई सकस परेको अनुभूति गरिँदैछ यतिबेला । अर्थात्, गच्छदारलाई दिइएको आश्वासनकै कारण आजको बैठकमा देउवाले पार्टी–पदाधिकारीहरूको नाम प्रस्ताव गर्न नसकेको गाइँगुइँ काङ्ग्रेस वृत्तमा चलिरहेको छ । फलतः नेपाली काङ्ग्रेस केन्द्रीय कार्यसमितिको निर्वाचित पदाधिकारीको आज बोलाइएको बैठक ‘विशेष कारण’ देखाउँदै स्थगित गरिएको छ । स्थगित बैठक आगामी वैशाख २१ गते दिउँसो २ बजे बस्ने जानकारी गराइएको छ ।
बैठकबाट पदाधिकारी मनोनीत गर्ने पार्टी सभापति देउवाको तयारी रहेकोमा वरिष्ठ नेता रामचन्द्र पौडेल समूहको असन्तुष्टिले पनि देउवालाई बैठक स्थगित गर्न प्रेरित गर्यो । केन्द्रीय समितिको निर्वाचित पदाधिकारी बैठक छलफल नै नगरी बोलाएको भन्दै वरिष्ठ नेता पौडेल र पूर्व महामन्त्री कृष्णप्रसाद सिटौला पक्षले बहिष्कार गर्ने घोषणा गरेको थियो । अबका चार दिन देउवाका लागि सोचविचार गर्ने, सल्लाह–परामर्श गरेर निर्णय लिने अवसर हुनेछ । तर, चार दिनमा पनि देउवाले उपयुक्त निर्णय लिएर पार्टीको सहमति जुटाउन सक्लान् भन्नेमा आशंका उत्तिकै कायम छ ।
प्रतिक्रिया