राष्ट्रिय जनता पार्टी (राजपा) मण्डलका अध्यक्ष राजेन्द्र महतोले सीमांकनसहितको संविधान संशोधन प्रक्रिया अगाडि बढे आफूहरु सरकारमा जाने बताएका छन् । गत वर्ष प्रहरीद्वारा मारिएका पाँच जना शहीदको सम्झानामा सप्तरीको राजविराजस्थित मलेठमा बुधबार आयोजित प्रथम पुण्यतिथि तथा श्रद्धाञ्जलिसभामा उनले सो कुरा बताएका हुन् ।

ठूला पार्टीले बनाएको संविधान त्रुटिपूर्ण रहेकाले मधेशी, दलित, पिछडिएका वर्ग, मुस्लिम, महिला लगायतको अधिकार हुने गरी संविधान संशोधन हुन जरुरी रहेको र त्यसमा आफूहरु पूर्ण रुपमा लागिरहेको महतोको भनाइ छ । उनले हामीलाई सत्ताभन्दा मधेशी, दलित र जनजातिको अधिकारको आवश्यकता छ भन्दै त्यसमा हाम्रो पार्टी पछि नहट्ने दाबीसमेत गरे । अब देशमा लडाईं झगडा समाप्त पार्नका लागि वाम गठबन्धनले पनि त्रुटिपूर्ण बनेको संविधानलाई संशोधन गर्नका लागि राजपा नेपालले पनि साथ दिने उनले बताए ।

राजपाकै अर्का अध्यक्ष राजकिशोर यादवले समेत संविधान संशोधनको पक्षमा अभिव्यक्ति दिएको सो कार्यक्रममा प्रदेश नं २ का भौतिक पूर्वाधारमन्त्री जीतेन्द्र सोनलले शहीद परिवारको रोजगारी, शिक्षादीक्षा, सरकारी सुविधाको व्यवस्था गरिने बताए । मधेशमा प्रहरीद्वारा हत्या गरेका शहीदको स्मृतिमा शहीद स्मारक बनाउने घोषणासमेत मन्त्री सोनलले गरे। समाजिक विकास मन्त्री नवलकिशोर साह र कृषिमन्त्री शौलेन्द्रप्रसाद साहले राजपा र फोरमले कहिले पनि मधेशी जनताको हितकोविपरीत काम नगर्ने वाचा गरे ।

गत २०७३ फागुन २३ गते नेकपा (एमाले)ले शुरु गरेको मेची–महाकाली अभियानअन्तर्गत मलेठमा आयोजना गरेको आमसभामा मधेशी कार्यकर्ता र प्रहरीबीच भएको झडपमा पाँच जना मधेशी कार्यकर्ताको मृत्यु भएको थियो ।

तस्बिर रासस