नेकपा माओवादी केन्द्रकी नेतृ रेणु दाहालले भरतपुर महानगरपालिकाको मेयर पदमा निर्वाचित भएपछि उनकी भाइबुहारी सिर्जनाले सामाजिक सञ्जालबाट बधाई तथा शुभकामना दिएकी छन् । रणुको भाई प्रकाशले अर्की श्रीमती ल्याएपछि परिवारबाटै बाहिरिएकी सृजनाले सामाजिक सञ्जाल फेसबुकमा भावुक स्टाटस पोस्ट गर्दै बधाई दिएकी छन् । सृजना पुष्पकमल दाहालका पुत्र प्रकाशकी श्रीमती हुन् । उनीहरुका एक छोरा छन् । औपचारिक रुपमा अझै सम्बन्ध बिच्छेद भएको छैन ।

सृजनाले रेणुको जितलाई धेरै समयपछिको खुसी भन्दै तर भेटेरै बधाई दिने अवस्था नपाएकोमा खिन्नता पोखेकी छन् । सिर्जनाले रेणुलाई ‘ढुंगाको कापबाट उम्रिएको पिपलको बोट’ को संज्ञा दिँदै स्वच्छ, इमानदार र पवित्र व्यक्तित्व रहेको भन्दै प्रशंसा गरेकी छन् । निर्वाचित भएको दिनमा जस्तै पदबाट हटेका दिनसम्म पनि आफ्नो पवित्रता र स्वच्छता जोगाउन उनले सुझाव दिएकी छिन् ।

उनले लेखेकी छिन्,‘धेरै समयपछि मन खुसी छ, कारण, भरतपुर महानगरपालिकाको प्रमुखजस्तो गरिमामाय पदमा रेणु दिदीले जित्नुभएको छ । दिदीसँग गला मिलाएर बधाई दिन मन थियो । तर, दुर्भाग्य । त्यो अवसर म बाट खोसियो । रेणु दिदी ढुंगाको कापमा उम्रिएको पिपलको बोट हो । सधैं अरुलाई शीतल दिनु । खास गरी भरतपुरका मतदाताप्रतिको धर्म नबिर्सनु । मेयर जितेको दिनमा जति पब्त्रि हुनुहुन्छ, पदबाट हटेको दिन पनि तपाईंको स्वच्छता, इमान र पवित्रतामा कसैले चोर औंला ठड्याउन नसकोस् । हार्दिक–हार्दिक बधाई, शुभकामना ।’