ड्रिम्स फिल्म पाइरेसी (चोरी)मा संलग्न दुईजनालाई महानगरीय अपराध महाशाखाले गत साता पक्राउ गरी सार्वजनिक गरेको छ । नेपाल प्रहरीको अपराध महाशाखाले वितरक हाइलाइट्स नेपाल प्रालि र निर्माता सुपर काजोल फिल्मको उजुरीका आधारमा रुपन्देहीका विधान गुरुङ र भक्तपुरका चन्द्र लबाजुलाई पक्राउ गरेको हो । चलचित्र निर्माता र वितरक क्रमश: हाइलाइट्स र सुपर काजोलले चलचित्रको बजार व्यवस्थापनअगावै डिजिटल तथा सिडीमा चलचित्र वितरण गरिएकाले आफूहरूलाई एक करोडबराबर क्षति पुगेको दाबीसहित उजुरी दिएपछि प्रहरीले अनुसन्धान थालेको थियो । आफ्नो फिल्मको पाइरेसी भएको र एक करोड क्षतिपूर्ति भराउनुपर्ने उजुरी सदाबहार नायक भुवन केसीले प्रहरी निकायमा दर्ता गराएको सन्दर्भले गत साता निकै चर्चा पाएको थियो । पक्राउ परेका व्यक्तिबाट प्रहरीले कम्प्युटर दुई थान, मोबाइल एक थान र पेनड्राइभ एक थानसहित गुरुङ र लबाजुलाई पक्राउ गरेको हो ।
नेपाल चलचित्र कलाकार सङ्घले समेत गैरकानुनी रूपमा पूरै चलचित्र पाइरेसी हुँदा निर्मातालाई ठूलो आर्थिक घाटा हुनुको साथै समग्र नेपाली चलचित्र क्षेत्रलाई समेत असर पार्ने भन्दै दोषीलाई कारबाही गर्न माग गरेको छ । यता, ‘ड्रिम्स’ पाइरेसी भएपछि तनावमा रहेका भुवनले पाइरेसीकर्ता पक्राउ गर्न सघाउने एसएसपी सवेन्द्र खनाल, विकास वोर्ड अध्यक्ष राजकुमार राई र कलाकार सङ्घका अध्यक्ष रामकेशर बोगटीलाई धन्यवाद त दिए, तर अब प्रश्न उठ्छ– के चलचित्र पाइरेसी गर्ने अवैध धन्दामा संलग्न अभियुक्तले भुवनलाई करोड रकम क्षतिपूर्ति तिर्न सक्लान् ? दोषी पक्राउ परेको तर मागेबमोजिम क्षतिपूर्ति नपाउँदा भुवनले कस्तो कदम चाल्लान् ? के भनी चित्त बुझाउलान् ?
प्रतिक्रिया