विराटनगर सहर तथा आसपास क्षेत्रको मूल संस्कृतिलाई प्रवद्र्धन गर्ने उद्देश्यले गत साता शुक्रबार विराटनगरको ह्यारिसन प्यालेस होटेलमा ‘सांस्कृतिक नगरी’ नामक एक विशेष कार्यक्रम आयोजना गरियो । बीपी कोइराला भारत–नेपाल प्रतिष्ठान र भारतीय दूतावासको आयोजनामा सम्पन्न सो कार्यक्रममा स्थानीय सांस्कृतिक सङ्घ–संस्था तथा समूहद्वारा स्थानीय संस्कृति झल्किने प्रस्तुति दिइएको थियो । कार्यक्रममा नृत्य, गायन, नाटक प्रदर्शन, नेपाली, मैथिली, सन्थाली, राजवंशी भाषामा विभिन्न सर्जकहरूबाट कवितासमेत पाठ गरिएका थिए । विराटनगरको भानु कला केन्द्रले नेपाली, मैथिली, राजवंशी र सन्थाली भाषामा स्थानीय नाच प्रदर्शन गरेको थियो भने विराट मैथिल नाट्य परिषद् नामक नाट्य समूहले जातीय विभेद र दाइजो प्रथाविरुद्ध सन्देशमूलक नाटक प्रस्तुत गरेको थियो । स्थानीय कलाप्रेमी, सञ्चारकर्मीलगायतको बाक्लो उपस्थितिबीच आयोजित कार्यक्रममा सुपरिचित गायक रामा मण्डल र वीरेन्द्र झाले गीत–सङ्गीत प्रस्तुत गरेर उपस्थित सबैलाई मन्त्रमुग्ध तुल्याएका थिए ।