पत्रकार पक्राउ गरिएको भन्दै स्वदेश तथा विदेशबाट विभिन्न प्रकारका टीकाटिप्पणी भएपछि अख्तियार दुरुपयोग अनुसन्धान आयोगले साझा यातायात सहकारी संस्थाको अध्यक्षको हैसियतमा मात्रै कनकमणि दीक्षितलाई पक्राउ गरिएको जनाएको छ । एक विज्ञप्ति प्रकाशित गरी आयोगले पत्रकार नै भएका कारण दीक्षितलाई पक्राउ गरिएको नभई सरकारी लगानीको कम्पनीमा संलग्न भएको व्यक्तिलाई छानबिनका लागि पक्राउ गरिएको प्रस्ट्याएको हो । आयोगका प्रवक्ता कृष्णहरि पुष्करले साझा यातायात सहकारी संस्थामा सरकारको ९५ प्रतिशतभन्दा बढी सेयर रहेको र उहाँ सार्वजनिक ओहदामा बसेको व्यक्ति भएकाले छानबिन गर्नु जायज तथा न्यायोचित रहेको विज्ञप्तिमा उल्लेख गरेका छन् ।

“दीक्षित साझा यातायातका अध्यक्ष हुन्, जुन यातायातको देशभरिमा ९५ प्रतिशत सेयर सरकारको रहेको छ, सार्वजनिक चासोको विषय हो”, विज्ञप्तिमा भनिएको छ । “दीक्षित आफू निर्दोष हुनुहुन्छ भने उहाँले विशेष अदालतमा उपस्थित भएर आफूलाई सफाइ दिन सक्नुहुन्छ, नेपालको कानुन, ऐन नियम तथा प्रावधानलाई सम्मान गर्नुहुन्छ भन्ने विश्वास व्यक्त गर्दछौँ”–प्रवक्ता पुष्करको विज्ञप्तिमा उल्लेख छ । विज्ञप्तिमा पदको दुरुपयोग गरेर भ्रष्टाचार गर्ने जो कोहीलाई आयोगले बाँकी नराख्ने र दीक्षित पत्रकार नै भए पनि कानुनभन्दा माथि हुन नसक्ने उल्लेख गरिएको छ । “पत्रकार कानुनभन्दा माथि हुँदैन, सञ्चारमाध्यम राज्यको चौथो अङ्गका रुपमा लिइन्छ, तर संवैधानिक निकायले पत्रकार भएकै कारणले एउटा भ्रष्टाचारको आरोप लागेका व्यक्तिमाथि छानबिन गर्न नपाउने भन्ने हुँदैन”– विज्ञप्तिमा जनाइएको छ ।

आयोगले सम्पत्ति विवरण बुझाउन गरेको पटक पटकको आग्रहलाई अस्वीकार गरेको र चार महिनाभन्दा लामो समयदेखि टेलिफोनद्वारा गरिएको अनुरोधलाई समेत अस्वीकार गरिएकाले स्थानीय प्रहरी प्रशासनको सहयोगमा पक्राउ गरिएको स्पष्ट पारेको छ । विधि, नियमसङ्गत तवरले गरिएको छानबिनलाई गलत तवरले प्रचारप्रसार नगर्न, तोडमोड नगर्न तथा तथ्य नबङ्ग्याउन आग्रह गर्दै आयोगले आफूहरू मानवाधिकारको सम्मान गर्न तयार रहेको जनाएको छ ।

कानुनको सम्मान गर्दै अनुसन्धान प्रक्रियालाई सहयोग गर्न र अदालत मार्फत आफूलाई निर्दोष साबित गर्न दीक्षितलाई उपयुक्त मौका समेत रहेको भन्दै आयोगले अभियुक्त दीक्षितलाई उपचारको सुविधा दिइएको र मानवाधिकारको सम्मानमा पूर्ण प्रतिबद्ध रहेको बताएको छ ।