पाकिस्तानी राजनीतिमा गठबन्धन सरकारको नेतृत्व गर्दै पूर्वप्रधानमन्त्री शहबाज सरिफ पाकिस्तानको राष्ट्रिय सभा (नेशनल एसेम्ब्ली)बाट दोस्रो कार्यकालका लागि प्रधानमन्त्री निर्वाचित भएका छन् ।
पाकिस्तान मुस्लिम लिग-नवाज (पीएमएल-एन)का अध्यक्ष तथा नवगठित आठ दलीय गठबन्धनका नेता सरिफलाई दोस्रो पटक प्रधानमन्त्री बन्न भारी मत मिलेको छ । साथै, जेलमा रहेका विपक्षी नेता इमरान खानका अनुयायीलाई सरकारमा पुग्न नदिन गठबन्धनलाई सफलता मिलेको छ ।
पाकिस्तानको नेशनल एसेम्बलीमा नवनिर्वाचित २०१ सांसदले सरिफको पक्षमा मतदान गरेका छन् भने पूर्वप्रधानमन्त्री खानप्रति वफादार सांसदहरूको उम्मेदवारका रूपमा प्रधानमन्त्रीको नेतृत्वको दाबी गरेका ओमार अयूब खानले ९२ मत प्राप्त गरेका छन् ।
निर्वाचनको परिणाम घोषणा गर्दै नेशनल एसेम्बलीका नवनियुक्त सभामुख सरदार अयाज सादिकले शहबाज सरिफ इस्लामिक गणतन्त्र पाकिस्तानको प्रधानमन्त्रीमा निर्वाचित भएको जनाएका हुन् । शहबाज पाकिस्तानका पूर्व प्रधानमन्त्री नवाज सरिफका सहोदर भाइ हुन् ।
यसैक्रममा, भारी वर्षाका कारण पाकिस्तानमा कम्तीमा २९ जनाको मृत्यु भएको छ भने पचास जना घाइते भएका छन् । देशको उत्तरपश्चिम खैबर पख्तुनख्वा प्रान्तका अधिकारीहरूले जनाएअनुसार वर्षा र बाढीले थुप्रै घरहरू भत्किएका र सडक अवरुद्ध भएको छ ।
प्रतिक्रिया