सञ्चारकर्मी, लेखिका तथा विश्वव्यापी विकासका अभियन्ता डा. संगीता श्रेष्ठ ‘स्वेच्छा’लाई युनिभर्सल पिस फेडरेशनद्वारा प्रतिष्ठित ‘एम्बेसडर फर पिस’ अवार्डबाट सम्मानित गरिएको छ । डिसेम्बर ९ मा लण्डनमा आयोजित अवार्ड समारोहमा शान्ति स्थापना र अन्तर्राष्ट्रिय विकासमा उनको योगदानको कदर गरिएको हो ।

विकास संचारमा पन्ध्र वर्ष भन्दा बढी अनुभव संगालेकी संगीताको महिला अधिकार, विश्वव्यापी शिक्षा, अनुसन्धान संचार र वातावरणीय संरक्षणमा योगदान रहेको छ । हाल, फिड द माइन्ड्स, लन्डनस्थित अन्तर्राष्ट्रिय विकास संस्थामा, उनी अफ्रिकी तथा एशियाका विभिन्न देशमा गरिबीमा परेका महिलाहरूलाई शिक्षाको माध्यमबाट सशक्त बनाउने अभियानमा संलग्न छिन् ।

‘एम्बेसडर फर पिस’ अवार्डले सामंजस्यपूर्ण संसार सिर्जना गर्ने उनको प्रतिबद्धतालाई प्रतिबिम्बित गर्दछ ।

प्रतिष्ठित पुरस्कार प्राप्त गरेपछि उनले कृतज्ञता व्यक्त गर्दै भनिन्, ‘शान्तिका लागि राजदूतको रूपमा मान्यता प्राप्त गर्न पाउँदा म अत्यन्तै सम्मानित महसूस गर्दैछु । यो पुरस्कारले मलाई थप योगदान गर्न उत्प्रेरित गरेको छ ।’

‘युनिभर्सल पिस फेडेरेसन एम्बेसेडर फर पिस अवार्डले समुदाय र सीमानामा शान्ति र सद्भावलाई बढावा दिनको लागि राम्रो नेतृत्व, वकालत र प्रतिबद्धता प्रदर्शन गरेका व्यक्तिहरूलाई सम्मान गर्दछ’, युनिभर्सल पिस फेडरेशन यु.के. का निर्देशक मार्गरेट अलीले भनेका छन् ।