• ^{_{सनत आचार्य, बेल्जियम}}

पासा पुच बेल्जियमले बेल्जियममा इही अर्थात बेल विवाह कार्यक्रम आयोजना गर्ने भएको छ ।

सामुहिक रुपले आयोजना गर्न लागिएको उक्त कार्यक्रममा युरोपका नेवार समुदायका अभिभावकहरुलाई आफ्ना नानीहरुलाई सहभागी गराउन अनुरोध गरिएको छ । सोका लागि अग्रीम नाम र टेलिफोन नम्बर उपलब्ध गराउन पासा पुचको आधिकारिक फेसबुक पेजमा उल्लेख गरिएको छ ।

बेल विवाहका सन्दर्भमा पासा पुच बेल्जियमका महासचिव सूर्यनारायण श्रेष्ठले बेल विवाह नेवारी संस्कारअन्तर्गत पर्ने भएकोले प्रवासमा पनि यो संस्कारलाई जीवन्त राख्न आफूहरुले सामुहिक बेलविवाह कार्यक्रम आयोजना गर्न लागेको बताए ।

श्रेष्ठले बेलविवाह गर्न योग्य नानीका अभिभावकहरु नेपालमा गएर बेलविवाह गर्दा समय र आर्थिक रुपले खर्चिलो हुने हुँदा सबैको सरलता र मितव्ययीताका लागि यो कार्यक्रम बेल्जियममा गर्न लागेको बताए ।

महासचिव श्रेष्ठका अनुसार सामुहिक बेलविवाहमा सरिक हुन छिमेकी देशहरुबाट समेत सहभागि हुने र हालसम्म एक दर्जन भन्दा बढीले नाम लेखाएको र यो संख्या अझ बढ्न सक्ने बताए ।

बेलविवाह कार्यक्रम ५ जुनका दिन बेल्जियमस्थित आउदनार्देको शिव मन्दिरमा गरिने आयोजकले बताएका छन् ।