पाकिस्तानका पूर्वप्रधानमन्त्री इमरान खानले गत साता गुजरानवालाको एक राजनीतिक र्‍यालीमा आफूमाथि आक्रमण भएपछि आफ्नो दाहिने खुट्टाबाट तीनवटा गोली निकालिएको बताएका छन् ।

पाकिस्तान तेहरिक-ए-इन्साफ प्रमुखले सीएनएनसँगको एक विशेष अन्तर्वार्तामा भने, ‘उनीहरूले मेरो दाहिने खुट्टाबाट तीनवटा गोली निकाले । बायाँ खुट्टामा केही छर्राहरू थिए जुन उनीहरूले भित्रै छोडेका थिए ।’

आफूविरुद्धको हत्याको सम्पूर्ण षड्यन्त्र दुई महिनाअघि  गरिएको उनको दाबी छ । यसबारे आफूले गुप्तचर निकायबाट सूचना प्राप्त गरेको उनले बताए ।

‘सम्झनुहोस्, म साढे तीन वर्ष सत्तामा थिएँ । मेरो गुप्तचर एजेन्सी र विभिन्न एजेन्सीहरू सञ्चालन गर्नेहरूसँग सम्पर्क छ’, उनले भनेका छन् ।