^{_{file photo}}

तत्काल निर्वाचनको मिति नतोके देशब्यापी आन्दोलनमा उत्रने एमालेको चेतावनी

महाधिवेशन सम्पन्न गरेको झण्डै दुई महिनापछि नेकपा माओवादी केन्द्रले पदाधिकारी चयन गर्न गृहकार्य सुरु गरेको छ । यही माघ २७ का लागि बोलाइएको केन्द्रिय समिति बैठकअघि नै महासचिवलगायतका पदमा सर्वसम्मत गराउने गरी आन्तरिक गृहकार्य बढाएको हो ।

गत पुस ११–१९ मा सम्पन्न महाधिवेशनले २ सय ९९ मध्ये अध्यक्षमा प्रचण्डससहित २ सय ३६ केन्द्रिय सदस्य चयन गरेर महाधिवेशन सम्पन्न गरे पनि पदाधिकारी चयन भने अझै गर्न सकेको छैन । मुख्यतः महासचिवका दावेदार वर्षमान पुन उपचारका लागि त्यसबेला चीनमा रहेका कारण पनि पदाधिकारी चयन नगरेको माओवादीले २७ माघमा केन्द्रिय समिति बैठक डाकेर पदाधिकारी चयन गर्न लागेको हो ।

माओवादीले गत महाधिवेशनबाट पारित गरेको विधानअनुसार वरिष्ठ उपाध्यक्ष, सात जना उपाध्यक्ष, एक जना महासचिव, दुई उपमहासचिव र बाँकी सचिव रहने गरी १५ सदस्यीय पदाधिकारी बनाउने छ ।

यसैगरी, बैठकले स्थायी समिति र पोलिटब्युरो र बाँकी रहेका खाली कोटामा केन्द्रिय सदस्य रहने गरी गृहकार्य गरेको हरिबोल गजुरेलले बताएका छन् । उनका अनुसार स्थानीय तहको निर्वाचनमा लाग्नुपर्ने भएकाले आगमी केन्द्रिय समितिबाट नै बाँकी पदपुर्ति र समितिलाई पुर्णता दिने माओवादी केन्द्रले योजना बनाएको छ ।

निर्वाचन आयोगले ४ जेठभित्रै स्थानीय तहको निर्वाचन गरिसक्नुपर्ने संवैधानिक र कानुनी बाध्यता रहेको उल्लेख गर्दै सरकारको ध्यानाकर्षण गराइसकेको छ । प्रधानमन्त्री शेरबहादुर देउवा सो विषयमा सकारात्मक भए पनि गठबन्धन दलका अन्य नेता अन्यौलमा रहेका कारण अझै निर्वाचनको मिति तय हुन भने सकेको छैन ।

यसैबीच तत्काल निर्वाचनको मिति घोषणा नगरे केन्द्रिय तहबाटै आन्दोलनको कार्यक्रम घोषणा गरी देशब्यापी आन्दोलनमा उत्रने नेकपा (एमाले)ले सरकारलाई चेतावनी दिएको छ ।