टोकियो ओलम्पिकमा पूर्व ब्वाइफ्रेण्ड हेडन वाइल्डले पदक जितेपछि उनकी पूर्व प्रेमिकाले ब्रेकअप गरेर गल्ती भएको भन्दै पछुतो मानेकी छन् । न्युजिल्याण्डका खेलाडी वाइल्डले ट्रायाथलन खेलतर्फ ओलम्पिकमा तेस्रो स्थान हासिल गर्दै काँश्यपदक जितेका थिए ।

न्युजिल्याण्डले पहिलो पटक ट्रायाथलनमा ओलम्पिकमा पदक जित्दा देशमा खुशीको माहोल भए पनि उनकी प्रेमिका भने निरास थिइन् । ती प्रेमिकाले ओलम्पिक शुरु हुनुभन्दा केही समयपहिले मात्रै वाइल्डसँग ब्रेकअप गरेकी थिइन् ।

पहिलो पटक ट्रायाथलनमा न्यूजिल्याण्डलाई पदक दिलाएपछि सञ्चारकर्मी वाइल्डको घर पुगेका थिए । घरका सबैजना खुशी थिए । सोही समयमा सञ्चारकर्मीको जम्काभेट वाइल्डकी प्रेमिकासँग भयो । सञ्चारकर्मीले वाइल्डकी प्रेमिकासँग वाइल्डले ओलम्पिकमा पदक जित्दा कस्तो महसूस भैरहेको छ भनेर सोधेका थिए । त्यसपछि ती प्रेमिकाको जवाफ थियो– ‘वाइल्डसँग ब्रेकअप गर्नु मेरो गल्ती थियो भन्ने महसूस भइरहेको छ । वास्तवमा मलाई यतिबेला पछुतो लागिरहेको छ ।’

त्यस्तै, वाइल्डले ओलम्पिकमा पदक जितेकोमा गर्व लागेको बताउँदै यहाँसम्म पुग्न वाइल्डले गरेको कडा मेहनतको प्रशंसासमेत गरेकी थिइन् । ‘हामीसँगै स्कुल जान्थ्यौँ, तर अहिले उ ओलम्पिकमा पदक जितेर ठूलो मान्छे भैसकेको छ, यसमा मलाई गर्व र अपसोच दुवै लागेको छ’, पूर्वप्रेमिकाको भनाइ छ ।