सन् २०२४ मा आयोजना हुने पेरिस ओलम्पिकमा ब्रेक डान्सिङ (ब्रेकिङ डान्स)लाई अन्तर्राष्ट्रिय ओलम्पिक कमिटी (आईओसी)ले आधिकारिक मान्यता प्रदान गरेको छ । युवा दर्शकहरूको आकर्षणलाई मध्यनजर गर्दै आइओसीले यस्तो निर्णय गरेको हो ।
ब्रेकिङ डान्सलाई ओलम्पिकमा सहभागिता गराउँदा ओलम्पिकको रौनक र लोकप्रियतासमेत बढ्ने आईओसीले विश्वास प्रकट गरेको छ ।
पेरिस ओलम्पिकमा ब्रेक डान्सिङ ‘ब्रेकिङ’ नामले चिनिने छ । यो नाम ७० को दशकमा संयुक्त राज्यमा उच्चारण गरिन्थ्यो । पेरिस ओलम्पिक आयोजकले दुई वर्षअगाडि ब्युनस आयर्समा आयोजित युवा खेलकुदमा ब्रेकिङ डान्सको प्रशिक्षण गरेको थियो । प्रशिक्षण सफल भएपछि पेरिस ओलम्पिकमा बे्रकिङको सहभागिताको लागि आयोजकले आइओसीसमक्ष प्रस्ताव गरेका थिए । पछि आइओसीको कार्यसमितिको बैठकले ब्रेकिङलाई मान्यता दिएको थियो ।
आधुनिक ओलम्पिक खेललाई सनसनी र रोमान्चकारी बनाउन आइओसीले आगामी वर्ष जापानमा आयोजना हुने टोकियो ओलम्पिकमा स्केटबोर्डिङ, स्पोर्ट क्लाइम्बिङ र सर्फिङ सहभागिता गराएको छ । यी तीन खेलको प्रतिस्पर्धा आगामी टोकियो ओलम्पिकमा हुनेछ ।
विश्वव्यापी रूपमा फैलिएको कोरोनाको माहामारीका कारण सन् २०२० मा जापानको टोकियो आयोजना हुने ओलम्पिक खेलकुद २०२१ म सारणी गरिएको छ । अब यो मितिमा जस्तोसुकै कोरोनाको महामारी भए पनि टोकियो ओलम्पिक तोकिएकै समयमै हुने आईओसीले जनाएको छ ।
आइओसीले पेरिस ओलम्पिकमा टोकियो ओलम्पिकको तुलनामा खेलहरूको सहभागिता समान रहने जनाए पनि पदक स्पर्धामा १० वटा कम हुने जनाएको छ । जसअनुसार भारोत्तोलनका चार समुह र बक्सिङका प्रतिस्पर्धामा कटौती गरिएको छ । अब पेरिस ओलम्पिकमा ३ सय २९ पदकको लागि प्रतिस्पर्धा हुनेछ । त्यस्तै पेरिस ओलम्पिकमा खेलाडीहरूको कोटामा पनि कटौती गरिएको छ । आइओसीका अनुसार अब पेरिस ओलम्पिकमा १० हजार ५ सय खेलाडीले मात्र सहभागिता जनाउन पाउने छन्, जुन टोकियो ओलम्पिकमा सहभागी खेलाडीको सङ्ख्या भन्दा ६ सयले कम हो ।
त्यस्तै, प्रशासनिक अनियमिततासँग जुझिरहेको बक्सिङ र भारोत्तोलन खेलका विभिन्न तौल समुहहरूमा पेरिस ओलम्पिकमा आइओसीले सबैभन्दा बढी कटौति गरेको छ । जसअनुसार अब पेरिस ओलम्पिकमा बक्सिङ र भारोत्तोलनका खेलाडीहरूको न्युन उपस्थिति रहनेछ । डोपिङको इतिहास र यसमा सुधार गर्नुका साथै लागु गर्ने कुरामा भैरहेको ढिलासुस्तीका कारण आइओसीले यस्तो निर्णय गरेको हो ।
यदि डोपिङ सुधारका लागि लागु गर्ने नियममा आनकानी गरियो भने यी दुवै खेललाई पेरिस ओलम्पिकबाट हटाउन सकिने पनि आइओसीले जनाएको छ । त्यस्तै आउँदो ओलम्पिकहरूमा पुरुष र महिलाको सहभागिता समान बनाउने आफ्नो दीर्घकालीन योजना भएको आइओसीले जनाएको छ ।
प्रतिक्रिया