इटालीको नेपोलीबाट लामो समय फुटबल खेलेका म्याराडोनाको सम्मानमा इटालीको चर्चित फुटबल क्लब नेपोलीले आफ्नो सन् पाउलो रङ्गशालाको नाम परिवर्तन गर्दै आधिकारिक रूपमै ‘डियगो अरमान्डो म्याराडोना’ राखेको छ ।

नेपल्सको सिटी काउन्सिलको गत साता बसेको बैठकले रङ्गशालाको नाम फेर्ने निर्णयलाई औचारिक रूपमा मान्यता दिएको थियो । नेपल्सका मेयर लुइगी डे मागिस्ट्रिसले प्रस्तुत गरेको प्रस्तावलाई काउन्सिलले स्वीकार गरेको हो । म्यारोडोनाले सात वर्ष नेपोली क्लबबाट ब्यावसायिक फुटबल खेल्दै १ सय १५ गोल गरेका थिए ।

नेपोली क्लबका अध्यक्ष एरेलो डे लुइरेन्टसले आफुले १७ वर्षअघि नै सन पाउलोको नाम परिवर्तन गरेर म्याराडोना राख्नुपर्ने भनेकोमा आज त्यसले औचारिकता रूपमा मान्यता पाउँदा निकै खुशी लागेको बताए ।

म्याराडोना नेपोलीमा अनुबन्ध हुँदा नेपाली इटाली सिरि ए लिगको पुछारमा रहेको थियो । म्याराडोनाको आगमनसँगै फड्को मारेको नेपोली केही वर्षमै लिग च्याम्पियन बनेको थियो । म्यारोडोनाले नेपोलीलाई लीग च्याम्पियन बनाउनुको साथै अन्य महत्वपूर्ण उपाधि दिलाएका थिए । म्यारोडोनाले सिरी ए उपाधिसँगै युइएफए कपका जितेर नेपोलीलाई विश्वकै चर्चित व्यवसायिक क्लबको रूपमा परिचित गराएका थिए ।

म्याराडोनाको गत साता हृदयघातबाट ६० वर्षको उमेरमा निधन भएको थियो । मस्तिष्कमा रगत जमेपछि शल्यक्रिया गरेर घरमा आराम गरिरहेका म्याराडोनालाई हृदयघात भएको थियो ।