सनत आचार्य, बेल्जियम

कोरोना कहरबीच गीतकार यशु थापाको गीति एल्बम ‘नाम’ एक कार्यक्रमका बीच बेल्जियमको राजधानी ब्रसेल्समा सार्वजनिक गरिएको छ ।

मंगलबार (१० नोभेम्बर) आयोजित गीत तथा भिडियो सार्वजनिक कार्यक्रमका प्रमुख अतिथि एवम बेल्जियमका लागि नेपाली राजदुत लोकबहादुर थापाले गीत र भिडियो सार्वजनिक गर्दै विदेशमा पनि गीत संगीतको माध्यमद्वारा नेपाली कला संस्कृति जगेर्ना गरिनु राम्रो कुरा भएको बताउनुभयो । उहाँले नेपालको पर्यटन क्षेत्रलाई पनि गीत, संगीत र कलाका माध्यमद्धारा प्रचार प्रसार गर्न सकिने सल्लाह दिनुभयो ।

कार्यक्रमका अतिथि एनआरएनए बेल्जियमका अध्यक्ष चित्र सुवेदीले गीत-संगीतले दोश्रो पुस्तालाई नेपाली कला, संस्कृति र साहित्यबारे जानकारी दिन सहयोग गरेको उल्लेख गर्दै यस्ता कार्यलाई निरन्तरता दिन आवश्यक रहेको सुझाव दिनुभयो ।

गीतकार थापाले नेपाली कला संस्कृतिलाई जीवन्त राख्न आफूले सानो प्रयास गरेको र सानो प्रयासमा प्राप्त हौसलाले आफु अझ बढि उत्साहित र प्रेरित भएको बताउनुभयो । उहाँले आफ्नो पहिलो एल्बम ‘गीताञ्जली’प्रति स्रोता र दर्शकले देखाएको मायाका कारण दोश्रो एल्बम निकाल्न सहयोग पुगेको जानकारी दिनुभयो ।

विमोचित एल्बममा यसु थापाद्वारा रचित पाँच वटा गीत रहेका छन् । उक्त गीतमध्ये दुई वटामा राज सागरले तीन वटा र सुरज थापाले दुई वटामा संगीत दिनुभएको छ भने गायकमा आनन्द कार्की, अन्जु पन्त, निशा देसार, सुरज थापा र राज सागर रहनुभएको छ ।

सार्वजनिक गरिएको उक्त गीतमध्ये हाल दुई वटा गीतको भिडियो निर्माण गरिएको र सोको छायाङ्कन नेपाल र भारतमा गरिएको गीतकार थापाले जानकारी दिनुभयो ।