८ कार्तिक २०७७, शनिबार

भुइँमान्छेहरूको जिन्दगी ..!

  प्रकाशित मिति
१५ आश्विन २०७७, बिहीबार १५:३९


■ देवकी तिमल्सिना

एकोहोरो झरिरहेछ वर्षात
नपत्याउने गरी घरी–घरी
डुबान र पहिरोमा पुरिएका छन् बस्ती
कहिल्यै नभेटिने गरी
हराएका छन् मानवहरू !

जिन्दगीका असीम आशाहरू
टुक्रिएका छन् शिशासरी
न किनार न छाल रोकिएको छ
जमिनको धाँजाहरू फटाउँदै कुदेको छ
एकतमासले नदी
खै ! कुन नशामा मस्त छन् देश बनाउँछु भन्नेहरू
र, फलाकिरहेका छन् बिनातयारीका योजना ।

सिङ्गै पहाड गर्लम्मै भत्किएर
विवेकहीन आतङ्क मच्चाइरहेछ
पूरै बस्तीका आँखाभरिका सपनाहरू
नियति बन्दै बगिरहेका छन्
कहालीलाग्दो ज्वारभाटासँगै
अनगिन्ती यादहरू छातीभरि बोकेर ।

मौसम पूर्वानुमान सुनाइएकै छ
विपत पूर्वतयारीका आश्वासनहरू
बग्रेल्ती छरिएकै छन्– आँखामा छारो हाल्दै
जो जाग्नुपर्ने हो ऊ सुतिरहेकै छ
जो उठ्नुपर्ने हो ऊ बसिरहेकै छ
विगत लामो समयदेखि मुकदर्शक भएर ।

बाढीले डुबिरहेको छ तराई
पहिरोले पुरिरहेको छ पहाड
टुटे–फुटेका छरपस्ट सामानहरू
यत्रतत्र छरिएका छन्
कोकोहोलो गरी चिच्याइरहेका छन्
एक हुल मान्छेहरू
गाँस, बाँस र निकास खोज्दै
अपुरणीय क्षति व्यहोरेर
बाध्य छन् सुस्ताउन
आकाशको छतमुनि ।

भत्किएपछि जोड्न नमिल्दो रहेछ– धर्ती
रात गएपछि देखेको सपना जस्तै
पटक–पटक टुटेको जिन्दगी
जोड्न गाह्रो हुँदोरहेछ
त्यसैले,
नदीले कटान गरेजस्तै गरी
भताभुङ्ग भएर भत्किएको छ
भुइँमान्छेहरूको जिन्दगी …!



प्रतिक्रिया दिनुहोस !
सम्बन्धित खबरहरु

विगतमा दशैं आएसँगै सखिया नृत्यले कञ्चनपुरका थारु गाउँमा छुट्टै रौनक ल्याउँथ्यो । तर, यो वर्ष गाउँमा सखियाको मादल बज्न छोडेपछि

डा. बाबुराम भट्टराई कोरोना भाइरसबाट संक्रमित भएका छन् । ७ कात्तिकमा परीक्षणको लागि दिइएको स्वाबको नतिजा आज पोजेटिभ आएको उनले

यस वर्ष सञ्चालित ‘ग्लोबल इ-कम्पिटिसन अन एस्ट्रोनोमी एण्ड एस्ट्रोफिजिक्स्’ मा नेपालले दुईवटा ‘अनरेबल मेन्सन अवार्ड’ जितेको छ । नेपालका लागि

बलात्कार प्रयास गरेका आरोपमा सप्तरीको महदेवा गाउँपालिका–३ बलिया बथनाहाका दुई जनालाई प्रहरीले नियन्त्रणमा लिएको छ । प्रहरीद्वारा नियन्त्रणमा लिइएका अभियुक्तहरु