तेह्रथुमको आठराई गाउँपालिका–४ इवास्थित केलिङ आधारभूत विद्यालयका व्यवस्थापन समिति अध्यक्ष डम्बर इङ्नामले आत्महत्या गरेका छन् ।

व्यवस्थापन समितिको बैठक बोलाएर अध्यक्ष इङ्नामले आत्महत्या गरेका हुन् । बिहीबार (८ असोज) बिहान १०ः०० बजे खाना खाएर बैठक बस्न भनी घरबाट निस्किएका इङ्नाम अपराह्न २ः०० बजेसम्म बैठकमा उपस्थित नभएपछि उनको खोजी शुरु गरिएको थियो ।

इङ्नामलाई खोज्न निस्किएका स्थानीयवासीले उनकै घरनजिकैको महाभीर भन्ने ठाउँमा शव झुन्डिएको अवस्थामा फेला पारेका थिए । वडा नं ४ का वडाध्यक्ष श्यामकुमार भट्टराईका अनुसार घटनास्थलको मुचुल्का गरी शव पोष्टमार्टमका लागि जिल्ला अस्पताल पाँचथर पठाइएको छ ।

घटनाका बारेमा आवश्यक अनुसन्धान शरु भएको जिल्ला प्रहरी कार्यालयका प्रहरी निरीक्षक तेजबहादुर दाहालले बताएका छन् ।

यसैबीच बुटवलको कोरोना विशेष अस्थायी अस्पतालमा उपचाररत् एक महिलाको कोरोना सङक्रमणबाट मृत्यु भएको छ । कपिलवस्तु वाणगंगा नगरपालिका–११ वनगाइका ७० वर्षीया महिलाको बिहीबार साँझ मृत्यु भएको हो ।

लुम्बिनी प्रादेशिक अस्पतालका सूचना अधिकारी डा.विष्णु गौतमका अनुसार मिर्गौलाको समस्या भएकी ती महिला यही असोज ५ गते अस्पतालमा भर्ना भई भेन्टिलेटरमा उपचार भइरहेको थियो ।