विशेष प्रतिनिधि, कपिलवस्तु

कपिलवस्तुको बाणगंगा नगरपालिका कोइलीनदीमा वेपत्ता भएकामध्ये थप एक जनाको शव फेला परेको छ ।

बिहीबार बिहानैबाट वेपत्ताहरुको खोेजीमा रहेका सशस्त्र प्रहरी बल पिपराका इन्स्पेक्टर अर्जुन ढकालका अनुसार अर्घाखाँची घर भएका केशव भाट क्षेत्रीको शव भेटिएको हो ।

खोजी गर्ने क्रममा वडा नम्बर ६ सुठौलीस्थित नदी किनारमा क्षेत्रीको शव फेला परेको बताउनुभयो । मध्यान्ह साढे १२ बजेतिर क्षेत्रीको शव घाँसमा अल्झिएको र घोप्टो परेको अवस्थामा भेटिएको ढकालले जानकारी दिए ।

वेपत्तामध्ये विद्यूत कार्यालय जितपुर शाखाका प्रमुख कृष्ण पौडेलको शव अझैसम्म भेटिएको छैन । उनको पनि खोजी भइरहेको र साँझसम्म फेला पारिने ढकालको दाबी छ ।

भलवाडबाट बनगाई आउने क्रममा कजवेमा बुधबार खोलाले जिप बगाउँदा ३ जना वेपत्ता भएका थिए । त्यसमध्ये जिपचालक माधवप्रसाद पाण्डेको भने बुधबार साँझ शव भेटिएको थियो ।

अहिले पनि सशस्त्र प्रहरी, नेपाल प्रहरी र नेपाली सेनाका तिनचार टोली खोजी कार्यमा लागिरहेका छन् ।