राखेपका कर्मचारीको जिम्मेवारी हेरफेर

राखेपका कर्मचारीको जिम्मेवारी हेरफेर


राष्ट्रिय खेलकुद परिषद्मा कार्यरत चार कर्मचारीको जिम्मेवारी हेरफेर गरिएको छ ।

आपूर्ति तथा भण्डार शाखाका प्रमुख बज्र केसीलाई विद्यालय खेलकुद विकास विभागको जिम्मेवारी दिइएको छ भने सुजन खतिवडालाई भण्डार शाखा प्रमुखको जिम्मेवारी दिइएको छ । उनी यसअघि पनि भण्डार शाखामै थिए ।

इन्द्रबहादुर कार्की संघ संस्था समन्वय शाखा प्रमुख बनेका छन् । कार्की १३ औं दक्षिण एसियाली खेलकुद तयारी सचिववलयमा थिए । उक्त शाखाका प्रमुख ज्ञानेन्द्र श्रेष्ठ गत भदौमा अनिवार्य अवकाश भएपछि प्रमुखको पद रिक्त थियो ।

त्यस्तै, शारदा दाहालले सामान्य प्रशासन शाखाको प्रमुखको जिम्मेवारी पाएकी छिन् । उनी पनि सोही शाखामा थिइन् । सामान्यका प्रमुख लवभक्त श्रेष्ठले गत असारमा राजीनामा दिएपछि पद खाली थियो । केसी २०४५ साल तथा बाँकी २०५३ सालमा परिषद् सेवामा प्रवेश गरेका थिए ।

राखेपका सदस्यसचिव रमेशकुमार सिलवालले बिहीबार पत्र हस्तान्तरण गर्दै पाएको जिम्मेवारीलाई कुशलतापूर्वक निर्वाह गर्ने विश्वास व्यक्त गरे ।