आरपी उपाध्याय, नवलपरासी

२५औँ सामुदायिक वन दिवसको अवसरमा पारिजात सामुदायिक वन उपभोक्ता समुह बर्दघाट–४ पश्चिम नवलपरासीले वन क्षेत्रमा वृक्षरोपण दिवस मनाएको छ ।

‘समृद्धिका लागि सामुदायिक वन उत्पादन र उत्पादकत्व वृद्धिमा योगदान’ भन्ने मूल नाराका साथ पारिजात सामुदायिक वन उपभोक्ता समुहको आयोजनामा समुहको वन क्षेत्रभित्र वृक्षारोपण गरिएको हो । समूहका अध्यक्ष चुडामणि भण्डारीको अध्यक्षता तथा बर्दघाट सरावल सव–डिभिजन कार्यालय बर्दघाटका प्रमुख रामनारायण शाहको प्रमुख आतिथ्यतामा वृक्षारोपण कार्यक्रम भएको थियो ।

कार्यक्रममा सो सामुदायिक वनका सरोकारवाला निकायले वन सरंक्षणका क्रममा वन क्षेत्रभित्रको चरिचरण बन्द हुँदा पशुपालक कृषकहरूलाई पर्न जाने असुविधामाथि मध्यनजर गर्दै पर्यावरण जोगाउने खालका कार्यक्रम ल्याउनुपर्ने कुरामा जोड दिए ।

सो अवसरमा सामुदायिक वन उपभोक्ता माहासंघका जिल्ला अध्यक्ष कमल परियार, सामुदायिक वन महासंघ प्रदेश नम्बर ५ की प्रदेश सदस्य लक्ष्मी बर्तौला, सशस्त्र प्रहरी बल यूक्ति तालिम महाविद्यालयका वरिष्ठ सशस्त्र प्रहरी उपरीक्षक प्रेमराज पोख्रेललगायतले विभिन्न जातका विरुवाहरू लगाई वृक्षारोपण कार्यक्रमको सुरुवात गरेका थिए ।

पारिजात सामुदयिक वनले मर्चाघोला उत्तरको वन क्षेत्रको खाली भूभाग करिव ५ हेक्टर क्षेत्रफलमा बकाइनो, आँप, टिक, सिमल लगायतका १२ सय ५० वटा विरुवा वृक्षरोपण गरिएको बताइएको छ । वृक्षारोपण कार्यक्रमबाट हरियाली बढाई वन विनास रोक्ने दृढता स्थानीय उपभोक्ताहरूले प्रकट गरेका छन् ।