विशेष प्रतिनिधि, कपिलवस्तु
ड्युटीमा रहेका स्वास्थ्यकर्मीमाथि हातपात गरी अस्पतालसमेत तोडफोड गर्ने उपर कारवाहीको माग गर्दै कपिलवस्तु अस्पतालमा कार्यरत डाक्टर तथा कर्मचारी आन्दोलित बनेका छन् ।
आन्दोलित डाक्टर तथा स्वास्थ्यकर्मीहरुले बिहीबार (२९ साउन)बाट अति आवश्यक सेवा बाहेक कुनै पनि सेवा प्रवाह नगर्ने सामुहिक घोषणा गरेका छन् ।
गत शनिबार साँझ कपिलवस्तु अस्पतालमा तातो चियाबाट जलेर घाईइते अवस्थामा आएकी एक वर्षीया बालिकाको उपचारका क्रममा उपचारमा संलग्न मेडिकल अधिकृतमाथि भएको हातपात र अस्पताल तोडफोडको विषयमा स्थानीय प्रशासनले कुनै कारवाही प्रक्रिया अघि नबढाएको भन्दै डाक्टर तथा अस्पताल कर्मचारीहरु आन्दोलत भएका हुन् ।
आज दिउँसो अस्पतालका मेडिकल सुपरिटेण्डेन्ट, मेडिकल अधिकृतदेखि सबै कर्मचारीहरुले सामुहिक रुपमा प्रेस विज्ञप्ति जारी गर्दै आजै दिउँसोबाट अस्पतालबाट प्रवाह गरिने सेवाहरु अनिश्चितकालीन रुपमा बन्द गरेको घोषणा गरेका छन् । आफ्ना माग सनुवाई नभए अस्पतालमा कार्यरत सबैस्वास्थ्यकर्मीहरुले सामुहिक रुपमा राजीनामा दिने समेत घोषणा गरेका छन् ।
शनिवार साँझ कपिलवस्तु नगरपालिका वडा नंं. ८ की एक र्षीय बालिका सोफिया खानको अस्पतालमा उपचारका क्रममा मृत्यु भएको थियो । मृतक बालिकालाई तातो चियाले पोलेर घाइते अवस्थामा उपचारका लागि कपिलवस्तु अस्पताल ल्याइएको थियो । उपचारका क्रममा अस्पतालका स्वास्थ्यकर्मीको लापर्वाही भएको भन्दै आक्रोशित मृतक बालिकाका आफन्तले डाक्टरमाथि हातपात गर्नुका साथै अस्पतालको इमर्जेन्सी वार्डमा तोडफोड गरेका थिए ।
डाक्टर कुटिँदा र अस्पताल तोडफोड हुँदासमेत स्थानीय प्रशासनले आफुहरुको समस्याबारे चासो नराखेका कारण बाध्य भई आफुहरु आन्दोलनमा उत्रिनु परेका आन्दोलित डा. गणेश क्षेत्रीले बताए ।
घटनाको छानविनका लागि गत शनिबार नै जिल्ला प्रशासन कार्यालयले सहायक प्रमुख जिल्ला अधिकारी गणेश नेपालीको संयोजकत्वमा ४ सदस्यीय छानविन समिति गठन गरि सकेको छ । बालिकाको मृत्यु अस्पतालको लापर्वाहीले भएको भन्दै जिल्ला प्रशासन कार्यालय अगाडि प्रदर्शनमा उत्रिएका मृतकका आफन्त र सर्वसाधारण प्रशासनबाट छानविन समिति बन्ने निर्णय भएपछि शान्त बनेका थिए ।
प्रतिक्रिया