यातायात व्यवसायीले सरकारसँग विभिन्न माग राखेर सेवा सञ्चालन नगरेपछि पछिल्लो चरणमा चर्चामा आएको मयुर यातायात प्रालिले सार्वजनिक बस सेवा शुरु गरेको छ ।

सोमबार (२९ असार) देखि तीन वटा बसबाट सेवा शुरु गरिएको सो प्रालिले जनाएको छ । कोभिड–१९ को रोकथाम तथा नियन्त्रणका लागि सरकारले गत चैत ११ देखि सार्वजनिक यातायात बन्द गरेकामा गत बुधबार बसेको मन्त्रिपरिषद् बैठकले सार्वजनिक यातायात खुलाउने निर्णय गरेको थियो । सरकारले बिहीबारदेखि सार्वजनिक यातायात खुलाउने भनेको पाँच दिनपछि मयुरले बस चलाउन थालेको हो ।

यो बीचमा बसको मर्मतलगायतको काम भइरहेको प्रालिका सञ्चालक दीपक भण्डारीले जानकारी दिए । पहिलो दिनमा काठमाडौं–बनेपा र चक्रपथ रुटमा बस चलेको छ । भण्डारीका अनुसार मयुरले आगामी दिनमा अरु बस थप्ने योजनासमेत बनाएको छ ।

मङ्गलबार र बुधबारदेखि अरु बस थप्दै जाने मयुरले जनाएको छ ।