नेकपा नेतृत्वबीच असमझदारी कायमै, स्थायी कमिटी बैठक पुनः स्थगित



आन्तरिक किचलोका कारण पटक पटक स्थगित हुँदै आएको सत्तारुढ नेपाल कम्युनिष्ट पार्टी (नेकपा)को स्थायी कमिटी बैठक पुनः स्थगन भएको छ ।

केही दिनदेखि प्रधानमन्त्री निवास बालुवाटारमा जारी रहेको नेकपाको पाँचौँ बैठक यही असार २४ गते बुधबारसम्मका लागि स्थगन गरिएको नेकपाका प्रचार विभाग उपप्रमुख सूर्य थापाले जानकारी दिएका छन् ।

यसअघि यही असार २० गतेलाई बोलाइएको बैठक आज (२२ असार) सम्म स्थगन गरिएकामा पुनः बुधबारसम्म स्थगन गरिएको हो । पार्टीमा देखिएको समस्या समाधानका लागि नेकपा अध्यक्ष एवम् प्रधानमन्त्री केपी शर्मा ओली र अर्का प्रचण्डबीच थप छलफल आवश्यक भएकाले बैठक स्थगन गरिएको बताइएको छ ।

नेकपाको स्थायी कमिटी बैठक पार्टी एकता, सरकारको कामको समीक्षा, मिलेनियम च्यालेन्स कर्पोरेशन (एमसिसी), संविधान संशोधनलगायतका विषयमा छलफल गर्नका लागि यही असार १० गतेदेखि जारी रहेको छ ।

अब पार्टीभित्र देखिएको विवाद समाधान गरेर मात्र बैठक बस्ने तयारी गरिएको बुझिएको छ ।

अध्यक्षद्वय केपी र प्रचण्ड पार्टीभित्र देखिएको विवाद समाधान गर्न निरन्तर छलफलमा रहे पनि सहमतिमा पुग्न सकेका छैनन् । हिजो आइतबार पनि दुई अध्यक्षबीच बालुवाटारमा छलफल भएको थियो भने आज पनि दुई अध्यक्षबीच विवाद समाधानका लागि छलफल हुने प्रचार विभाग उपप्रमुख थापाले जानकारी दिएका छन् ।



नेकपामा विवाद मत्थर हुनुको साटो बढ्दै गएको परिवेशबीच आइतबार साँझ नेपालका लागि चिनियाँ राजदूत हौ यान्छीले नेकपाका प्रभावशाली नेता माधव नेपालसँग भेट गरेको सन्दर्भ यतिबेला चर्चामा छ ।

प्रतिक्रिया