कोरोना भाइरसको स्रोत पत्ता लगाउनको लागि विश्व स्वास्थ्य संगठनले एक विशेष टिम चीन पठाउन लागेको संगठनले जनाएको छ ।
कोभिड–१९ को राजनीतिकरण तथा यसबारे विभक्त विश्वका बीच डब्लुएचओले कोरोना महामारीको अझै डरलाग्दो चरण आउन बाँकी नै रहेको चेतावनी दिएको छ । यही क्रममा आगामी साता आफ्नो विशेष टिम चीन पठाएर वैश्विक महामारी फैलाउने भाइरस आखिर कहाँबाट आएछ भनी अनुसन्धान गर्न लागेको जानकारी डब्लुएचओले गराएको हो ।
गत मे महिनाको आरम्भदेखि नै डब्लुएचओले कोरोना भाइरसको एनिमल सोर्स पत्ता लगाउने कार्यमा मद्दत गर्न आफ्नो विशेषज्ञ समूहलाई चीन बोलाउन आग्रह गर्दै आएको थियो ।
विश्व स्वास्थ्य संगठनका प्रमुख टेड्रोस एडहनोमले एक भर्चुअल प्रेस कन्फ्रेन्समा भनेका छन्– ‘जब यो भाइरसको बारेमा हामीलाई सबै जानकारी हासिल हुन्छ तब मात्र यसविरुद्ध सही तवरले लड्न सकिन्छ । तसर्थ, यो कहाँबाट कसरी उत्पत्ती भयो भन्ने पत्ता लगाउनु आवश्यक छ ।’
वैज्ञानिकहरूको मान्यता रहँदै आएको छ कि उक्त भाइरस जनावरबाट मानिसमा सरेको हो र सम्भवतः वुहान शहरको एक मासु–बजार नै यसको उत्पत्ति थलो हो ।
प्रतिक्रिया