लिपुलेक क्षेत्र अतिक्रमण गरेर भारतले सडक बनाएको भन्दै भारतीय राजदूतावास अगाडि विरोध प्रदर्शन गर्न पुगेका मानव अधिकारकर्मी कृष्ण पहाडीसहितका व्यक्तिलाई प्रहरीले नियन्त्रणमा लिएको छ । लकडाउन उल्लङ्घन गरेकाले उनीहरुलाई नियन्त्रणमा लिएर नगर प्रहरीमा राखिएको प्रहरीले जनाएको छ ।

पहाडीसहित लकडाउन उल्लङ्घन गर्ने ५१ जनालाई पक्राउ गरिएको महानगरीय प्रहरी कार्यालय काठमाडौंका प्रमुख प्रहरी नायव महानिरीक्षक विश्वराज पोखरेलले बताए । उनीहरुलाई दिनभर हिरासतमा राखेर छाडिने जनाइएको छ । केही दिनअघि भारतले सीमा अतिक्रमण गरेको विरोधमा उत्रिएका नेपाल कम्युनिस्ट पार्टी (नेकपा)का विद्यार्थी नेतासहित ३३ जनालाई पनि प्रहरीले नियन्त्रणमा लिएर छाडेको थियो ।

यतिबेला मुलुकका विभिन्न क्षेत्रमा सीमा अतिक्रमणको विरोध भइरहेको छ । सरकारले सडक बनाएको विषयमा कूटनीतिक नोट पठाउँदै शान्तिपूर्ण रुपमा विवाद समाधानका लागि भारतलाई आह्वान गरेको छ भने उक्त क्षेत्र नेपालको भूमि भएको सरकारी धारणा अघिसारेको छ ।

file photo