रसियाको ऱ्याजान क्षेत्रमा एक व्यक्तिले रातिको समयमा आफ्नो घरको झ्यालमुनि सडकमा बसेर जोड–स्वरले गफ गरेको निहुँमा पाँच व्यक्तिलाई गोली हानेर हत्या गरेका छन् ।

एएफपीका अनुसार कोरोनाभाइरसका कारण स्थानीयवासीलाई आ–आफ्ना घरभित्र बस्न आदेश दिइए पनि ती पाँच व्यक्ति अर्कैको घरछेउ सडकमा बसेर हल्ला गरेका थिए । मृत्यु भएकाहरुमा चार जना पुरुष र एक महिला छन् । यो घटना शनिबार (४ अप्रिल) राति १० बजे भएको थियो ।

राजधानी मस्कोबाट दक्षिणपूर्व करिव २०० किलोमिटर टाढाको ऱ्याजान क्षेत्रस्थित येलात्मा गाउँमा उक्त घटना भएको समाचारमा जनाइएको छ ।

प्रहरीले गोली चलाउने व्यक्तिलाई एक थान राइफलसहित गिरफ्तार गरेको छ ।