इरानमा नयाँ कोरोनाभाइरसको सङ्क्रमणबाट विगत २४ घण्टाको अवधिमा ५४ जनाको मृत्यु भएको छ । इरानमा एकै दिन कोरोनाको सङ्क्रमणबाट यति ठूलो सङ्ख्यामा मानिसको मृत्यु भएको पहिलो घटना भएको इरानी अधिकारीहरूले बताएका छन् ।

पछिल्लो मृत्युसँगै इरानमा कोरोना सङ्क्रमित भई मर्नेहरूको सङ्ख्या २९१ जना पुगेको स्वास्थ्य मन्त्रालयका प्रवक्ता कियानुस जहानपोरले बताए । कोरोना सङ्क्रमित व्यक्तिहरूको सङ्ख्या निरन्तर बढेको बताउँदै उनले पछिल्लो पटक ८८१ जनामा कोरोना भएको पुष्टि भएको जानकारी दिए ।

इरानमा अब सङ्क्रमित व्यक्तिको कूल सङ्ख्या ८ हजार ४२ पुगेको छ । जोहानपोरले यसबीच दुई हजार ७३१ जना भने निको भएर घर फर्केको बताएका एएफपीले जनाएको छ ।

कोरोनाको सङ्क्रमणबाट सर्वाधिक प्रभाव राजधानी तेहरानमा परेको छ जहाँ दुई हजार ११४ जना सङ्क्रमित भएका छन् ।

क्यास्पियन सागरसँग सीमा जोडिएको लोकप्रिय पर्यटकीय क्षेत्र मजान्दारान प्रान्तमा ८८६ जना तथा क्वोममा ७५१ जनामा कोरोनाको सङ्क्रमण देखिएको छ ।

इरानले अझैसम्म आधिकारिक रूपमा मानिसहरूलाई क्वारेन्टाइनमा रहन बाध्य बनाएको छैन, तर अधिकारीहरूले मानिसहरूलाई अनावश्यक यात्रा नगर्न तथा यात्रा निरुत्साहित गर्ने उद्देश्यले होटलहरू बन्द गर्न आदेश दिएको छ ।