कोरोना भाइरसको सङ्क्रमण तीब्र फैलिएको इरानमा शुक्रबार थप १७ जनाको मृत्यु भएको छ । योसँगै इरानमा कोरोनाभाइरस सङ्क्रमणका कारण मृत्यु हुनेको सङ्ख्या १२४ पुगेको इरानी अधिकारीले बताएका छन् ।
चिनियाँ समाचार संस्था सिन्ह्वाले जोन हकिन्स विश्वविद्यालयलाई उद्धृत गदै संसारभर कोरोना भाइरसबाट सङ्क्रमितको सङ्ख्या शुक्रबार (६ मार्च) एक लाख नाघेको जनाएको छ ।
स्थानीय समय अनुसार शुक्रबार बिहान आठ बजेसम्म कूल एक लाख ११३ जनामा कोरोनाभाइरसको पुष्टि भएको विश्वविद्यालयकोे तथ्याङ्कमा उल्लेख छ ।
‘पछिल्ला केही दिनमा देशभरिमा कोरोना भाइरसबाट सङ्क्रमितको थप सङ्ख्या एक हजार २३४ रहेको छ,’ स्वास्थ्यमन्त्री किअनोस जाहनपोरले भनृे– ‘सङ्क्रमितको कूल सङ्ख्या ४७४७ पुगेको छ । सङ्क्रमित भएको पुष्टि भएका यी विरामीहरू सम्भवतः दुई हप्ता अगाडि नै सङ्क्रमित भएका र हाल उपचारका लागि अस्पताल आउँदा उनीहरूमा सङ्क्रमण पुष्टि भएको हो ।’
इरानमा कोरोना भाइरसबाट सङ्क्रमित भएको आशङ्कामा १५ हजार ९८० व्यक्तिको स्वास्थ्य परीक्षण गरिएको थियो । कोरोना भाइरस सङ्क्रमित भएपछि निको भएका व्यक्तिहरूको सङ्ख्या भने ९१३ भन्दा बढी पुगेको छ ।
अधिकारीहरूका अनुसार सङ्क्रमितमध्ये सबैभन्दा धेरै राजधानी तेहरानमा रहेका छन् । त्यसैले तेहरानलाई इरानमा कोरोना भाइरसको केन्द्र मानिएको छ ।
यसैबीच स्पेनमा थप पाँच जनालाई कोरोना भाइरसको सङ्क्रमण पुष्टि भएको छ । योसँगै यहाँ कोरोनाभाइरसबाट सङ्क्रमितको सङ्ख्या ३६५ पुगेको स्वास्थ्य अधिकारीहरूले शुक्रबार जानकारी दिएका छन् ।
यसअघि बिहीबारसम्म एकैदिन १०२ जनाको समूहलाई सङ्क्रमण भएको पुष्टि गरिएको थियो । त्यस्तै यूरोपेले अर्को मुलुक नेदरल्याण्डमा पनि कोरोना भाइरसबाट सङ्क्रमित पहिलो विरामी भेटिएका छन् । स्वास्थ्य अधिकारीहरूले ८६ वर्षीय एक वृद्धमा कोरोना भाइरसको पुष्टि भएको जानकारी दिएका छन् ।
इटालीमा १४८ को मृत्यु
इटालीमा कोरोना भाइरसबाट १४८ जनाको ज्याान गएको प्राप्त पछिल्लो समाचारमा जनाइएको छ । इटालीमा बिहीबार मात्र ४१ जनाको मृत्यु भएको समाचार आएको छ । यो समेतगरी यहाँ यस भाइरसको प्रकोपबाट मृत्यु हुनेको सङ्ख्या १४८ पुगेको हो ।
इटालीका विभिन्न २२ वटा शहरमा यसको प्रकोप देखिएको छ । इटालीले देशैभरिका विद्यालय, विश्वविद्यालय बन्द गराएको छ । सरकारले यो भाइरसको नियन्त्रणका विभिन्न कार्यक्रम घोषणा गरी कार्यान्वयन गराएको छ ।
उता संयुक्तराज्य अमेरिकाको क्यालिफोर्नियामा पनि यस प्राणघातक कोरोना जीवाणु (भाइरस)का कारण एक व्यक्तिको मृत्यु भएपछि सङ्कटकाल घोषणा गरिएको अर्काे एक समाचारमा जनाइएको छ ।
विश्वभर हाल कोरोना सङ्क्रमित व्यक्तिको सङ्ख्या ९६ हजारभन्दा बढी पुगिसकेको छ, र तीमध्ये करिब ८० भन्दाबढी हजार चीनमा रहेको बिबिसीले जनाएको छ । गत डिसेम्बरको अन्त्यबाट चीनको हुबेई प्रान्तको उहान शहरबाट शुरु भएको यस कोरोना भाइरस सक्रमणबाट चीनमा मात्र तीन हजारभन्दा बढीको मृत्यु भएको छ ।
कोरोनाकै कारण दक्षिण कोरियामा हालसम्म ४३ जनाको मृत्यु भइसकेको छ । त्यसैगरी छ हजार ५९३ जनामा कोरोना सङ्क्रमण देखिएको शुक्रबार प्राप्त एक समाचारमा जनाइएको छ ।
जोखिम नियन्त्रण गर्न दक्षिण कोरियाका प्रधानमन्त्री चुङ स्ये–क्यूनले अनुहारमा लगाउने मास्क विदेश निर्यात गर्न प्रतिबन्ध लगाइएको घोषणा गर्नु भएको छ ।
प्रतिक्रिया