पर्यटन वर्ष २०२० को नारालाई लक्षित गरी आयोजित प्रथम ललितपुर महानगरपालिका मेयर कप राष्ट्रिय फुलकन्ट्याक्ट कराते प्रतियोगिता–२०७६ सम्पन्न भएको छ । नेपाल बालकुमारी क्योकुशिन कराते संघको आयोजनामा यही फागुन १६ र १७ गते ललितपुरको मंगलबजारमा आयोजित प्रतियोगिताको उद्घाटन शहरी विकास राज्यमन्त्री रामवीर मानन्धरले गरेका थिए ।

२०५४ सालमा बालकुमारी डोजोको रूपमा स्थापित भई क्रियाशील भएको सो संघले जापानको क्योकुशिन युनियनबाट सम्बन्धन प्राप्त गरेको छ । संघका अध्यक्ष सुरेन्द्र डंगोलका अनुसार हाल क्योकुशिन युनियन जापानका प्रमुख चिचिनोय यासु हिरो रहेका छन् ।

गत शुक्रबार उद्घाटन भई शनिबार सम्पन्न प्रतियोगितामा पुरुष ३० केजी तौल समूहबाट सचिन पुन प्रथम, सागर थिङ द्वित्तिय र रमित महर्जन तृतीय भए भने ३५ केजी समूहमा विश्वास मल्ल ठकुरी, साहिल पुन र विक्रम चौधरी क्रमशः पहिला, दोस्रा र तेस्रा भए ।

यस्तै, ४५ केजी समूहमा पहिलो– निरज लामा, दोस्रो– अनमोल माझी र तेस्रो– अनमोल मल्ल, ५० केजी समूहमा सञ्जय राई पहिलो, प्रवीन राना दोस्रो र सञ्जय गुप्ता तेस्रो भए भने ६० केजी समूहमा थमप्रसाद खड्का पहिलो, पुष्कर राउत दोस्रो र अजय चौधरी तेस्रो भएका थिए ।

यसैगरी पुरुष खुल्लातर्फ सनि सुनार पहिलो, विनय सिङ दोस्रो र रविन राना तेस्रो भए भने महिलातर्फ ५० केजी तौल समूहमा संगीता तामा पहिलो, अनिता एसके दोस्रो र शान्ति थापा मगर तेस्रो भइन् । यस्तै, ५५ केजी समूहमा दीपा शाही पहिलो, रञ्जिता गुरुङ दोस्रो र अमृताकुमारी सेन ठकुरी तेस्रो भइन् भने महिला खुल्लातर्फ अम्बिका भुजेलले पहिलो, अनुपा नेपालीले दोस्रो र जुनकिरी श्रेष्ठले तेस्रो स्थान हासिल गरेकी थिइन् ।

प्रतियोगितामा रामजी प्रसाद बज्राचार्यले मूख्य जुरी (निर्णायक)को भूमिका निर्वाह गरेका थिए ।

प्रतियोगिता समापन कार्यक्रममा विजेता खेलाडीहरूलाई पुरस्कार र मेडलसहित सम्मान गरिएको अध्यक्ष डंगोलले जानकारी दिए ।