काभ्रेका अर्जुन लामाको हत्याका प्रमुख जिम्मेदार पात्र भन्दै पूर्व माओवादी एवम् सत्तारुढ नेकपाका नेता अग्नि सापकोटाको विरोधमा शनिबार पनि राजधानीको माइतीघर मण्डलामा विरोध प्रदर्शन गरियो । मानवाधिकारकर्मीहरूको अगुवाईमा भएको प्रदर्शनमा सापकोटालाई सभामुख बनाउन नहुने आवाज चर्को रूपमा उठाइयो । हत्या गरिएका अर्जुन लामाकी पत्नी पूर्णिमायाले आफूले न्याय पाउनुको साटो उल्टै अपराधकर्मवापत सजाय पाउनुपर्ने व्यक्तिलाई नै राज्यले पुरस्कृत गरेर न्यायको आशामाथि तुषारापात भएको भन्दै गुनासोमिश्रित आक्रोश पोखिन् ।

तर, पूर्णिमायाको गुनासो आँशुसँगै बगेर विलाउने निश्चितप्रायः देखिएको छ । अर्थात्, सभामुखका निर्विरोध उम्मेदवार अग्नि सापकोटालाई प्रतिनिधिसभाले आज ‘सम्माननीय सभामुख’को आधिकारिकता प्रदान गर्दैछ ।

सापकोटालाई सभामुख बनाउने सत्तारुढ दलको यस ज्यादतिपूर्ण पहलकदमीविरुद्ध आवाज उठाउने दायित्व बोकेको प्रमुख प्रतिपक्षी दल नेपाली काङ्ग्रेस समेत मौन बसिदिँदा आफ्नो चहऱ्याइरहेको घाउमा नुनचुक दलेको अनुभूति भएको पूर्णिमायाको गुनासो छ । हुन पनि द्वन्द्वकालीन आपराधिक घटनाबाट पीडितलाई न्याय दिलाउन अहम् भूमिका निर्वाह गर्नुपर्ने दल भएको महसुस नगरी काङ्ग्रेस यतिबेला सत्तासँग ‘उपसभामुख’ पदको भिख माग्न तल्लीन देखिँदैछ । नेपाली काङ्ग्रेसको यस रवैयालाई ऐतिहासिक भूलको रूपमा आमनेपालीले पछिसम्म आलोचना गर्ने काङ्ग्रेस नेतृत्व तहका एक नेता बताउँछन् ।