अख्तियार दुरुपयोग अनुसन्धान आयोगका २१ जना अधिकारीको दोस्रो ब्याचले गुजरात (भारत)को गान्धीनगरस्थित गुजरात फरेन्सिक साइन्सेस युनिभर्सिटी (GFSU) मा ‘ठगी, घूसखोरी र भ्रष्टाचार निवारण’ विषयमा ६ दिवसीय प्रशिक्षण सुरु गरेका छन् । सोमबार (२१ पौष)बाट शुरु भएको प्रशिक्षण कार्यक्रमले सम्बद्ध नेपाली अधिकारीहरूको क्षमता विकासमा भारतको निरन्तर प्रतिबद्धतालाई पुष्टि गरेको नेपालस्थित भारतीय दूतावासले जनाएको छ ।

यसअघि अख्तियार दुरुपयोग अनुसन्धान आयोगकै २१ जना अधिकारीको पहिलो ब्याचले GFSU मा गत ३० मंसिरदेखि पौष ५ सम्म सोही विषयमा प्रशिक्षण लिइसकेका छन् । संकायका अनुभवी सदस्यहरूबाट सञ्चालित सो प्रशिक्षण नेपाली अधिकारीले अत्यन्तै राम्रो र फलदायी रहेकोे प्रतिक्रिया दिएका थिए । नयाँ तथा उपयोगी विचारसहित अनुसन्धान कार्यलाई अघि बढाउन सो प्रशिक्षणले नेपाली अधिकारीलाई सक्षम बनाएको तालिम आयोजक पक्षको भनाई छ ।

बताइएअनुसार नेपाल सरकारको आग्रहमा अख्तियार दुरुपयोग अनुसन्धान आयोगका जम्मा ४२ अधिकारीका लागि तयार पारिएकोे यो एक विशेष कोर्ष हो । नेपालमा भ्रष्टाचारका गतिविधिहरूमा अंकुश लगाउन एवम् सुशासन कायम राख्न यो कोर्षले अख्तियार दुरुपयोग अनुसन्धान आयोगको संस्थागत क्षमतालाई सुदृढ पार्नेछ । मुख्यतः भ्रष्टाचारका कारकहरूको पहिचान, अर्थतन्त्रमा यसको प्रभाव तथा यसको पहिचान र रोकथामका लागि प्रयोग हुने विधिहरूमा यो कोर्ष केन्द्रित छ । सूचना प्रविधिमा आधारित अनुसन्धानका लागि यो कार्षले अधिकारीको सीप अभिवृद्धि गर्नुका साथै उनीहरूको विश्लेषणात्मक क्षमतालाई तिखारी नयाँ विधिहरू सिक्नलाई मद्दत गर्ने बताइन्छ । अन्ततः यसले भ्रष्ट तथा ठगी गर्ने व्यक्तिहरूको पहिचान, निवारण एवम् कानूनी कारवाही गर्न यी अधिकारीलाई सक्षम बनाउने तालिम आयोजक पक्षको दाबी छ ।

फरेन्सिक विज्ञान, अपराध अनुसन्धान, सुरक्षा तथा व्यवहार विज्ञान र अपराध विज्ञान क्षेत्रमा फरेन्सिक विज्ञलाई प्रशिक्षण दिनका लागि प्रख्यात गुजरातको गान्धीनगरस्थित गुजरात फरेन्सिक साइन्सेस युनिभर्सिटीमा अधिकारीलाई प्रशिक्षण दिइएको छ । भारत सरकारको पूर्ण सहयोग रहेको सो कोर्ष भारतीय विदेश मन्त्रालयको प्राविधिक तथा आर्थिक सहयोग (ITEC) कार्यक्रमअन्तर्गत रहेको छ ।