मङ्सिर १४ गते भक्तपुर क्षेत्र नं १ (क) मा हुने प्रदेशसभा सदस्य पदको उपनिर्वाचनमा राष्ट्रिय प्रजातन्त्र पार्टी (संयुक्त)ले नेपाली कांग्रेसका उम्मेदवारलाई सघाउने भएको छ । उपनिर्वाचनमा राप्रपा संयुक्तको आफ्नै उम्मेदवार नभएपछि कांंग्रेसलाई समर्थन गर्ने घोषणा गरिएको हो ।

नेपाली कांग्रेस र राप्रपा संयुक्तले आइतबार (८ मंसिर) कमलविनायकमा आयोजना गरेको कार्यगत एकता घोषणासभामा राप्रपा संयुक्तले आफ्नो पार्टीको सम्पूर्ण भोट कांग्रेसका उम्मेदवार कृष्णलाल भडेललाई दिने गरी कार्यगत एकताको घोषणा गरेको हो । कार्यक्रममा राप्रपा संयुक्तका केन्द्रीय सदस्य रवीन्द्रप्रताप शाह, दिनेश श्रेष्ठ, रामेश्वर थापा र भक्तपुरका अध्यक्ष रामशरण लामिछानेले राप्रपाको सबै भोट नेपाली कांग्रेसका उम्मेदवारलाई हाल्ने गरी समर्थन गर्दै कार्यगत एकता गरेको घोषणा गरे ।

कार्यक्रममा कांग्रेस केन्द्रीय सदस्य सीता गुरुङ, कांग्रेसको आमन्त्रित केन्द्रीय सदस्य रमा पौडेल, जिल्ला सभापति दुर्लभ थापा र क्षेत्रीय सभापति जीवन खत्रीले राप्रपाको मतलाई समर्थन गर्दै चुनावमा मात्रै नभई विकासमा समेत कार्यगत एकता गर्दै जाने बताए ।