रामचन्द्रको सुझाव– सीमाविवादमा केपीले मोदीसँग वार्ता गर्नुपर्छ


नेपाली कांग्रेसका वरिष्ठ नेता रामचन्द्र पौडेलले नेपाल सरकारले सीमाविवादमा देखिएको समस्या समाधानका लागि प्रधानमन्त्री आफैँले भारतसँग वार्ता गर्न सुझाव दिएका छन् । नेपाल प्रेस युनियन झापा शाखाले बुधबार झापामा आयोजना गरेको पत्रकार भेटघाटमा पौडेलले सीमाविवाद सचिवस्तरको बैठकबाट नटुंगिने भएकोले प्रधानमन्त्री स्वयंले भारतीय प्रधानमन्त्रीसँग वार्ता गर्नुपर्ने बताएका हुन् ।

विवाद समाधानका लागि सरकार अघि बढे त्यसमा सहयोग गर्न प्रतिपक्षी दल कांग्रेससमेत तयार रहेको जानकारी दिँदै नेता पौडेलले आवश्यक प्रमाण नजुटाई हतारमा सीमाविवादको कुरालाई अन्तर्राष्ट्रियकरण नगर्न सुझाव दिनुभयो । ‘छिमेकीको हेपाहा प्रवृत्ति र नेपालको लापरबाहीका कारण सीमा सुरक्षामा प्रश्न उठेको छ,’ नेता पौडेलले भने, ‘अहिले दुईतिहाईको बलियो सरकार छ, कसैले ढाल्छ कि भनेर डराउनुपर्ने अवस्था छैन, यो सरकारले लिपुलेक, लिम्पियाधुरा, कालापानीसहित सीमाविवाद देखिएका अन्य क्षेत्रमा नेपालको भूभागका प्रमाण संकलन गरेर सरकार कडा रूपमा प्रस्तुत होस् ।’

नेपाली कांग्रेस झापा शाखाको आयोजनामा बिहीबार जिल्ला पार्टी कार्यालयमा हुने कार्यकर्ता भेलालाई सम्बोधन गर्न पौडेललगायत कांग्रेस नेता डा. शेखर कोइराला, अर्जुननरसिंह केसी, डा. रामशरण महत, डा. मीनेन्द्र रिजाल, धनराज गुरुङ, सरिता प्रसाईं र बद्री पाण्डे झापा आएका छन् ।
rss

प्रतिक्रिया