१० माघ २०७७, शनिबार

त्यसबेला माओवादीको सहयोग सबैले लिएका थिए : मोहन कार्की

  प्रकाशित मिति
२० कार्तिक २०७६, बुधबार १२:३८


वि.सं. २०१६ साल साउन ३ गते धादिङको साबिक साँखु, चैनपुर हालको नीलकण्ठ नगरपालिका–३ मा जन्मनुभएका मोहन कार्कीले राजनीतिशास्त्रमा त्रिभुवन विश्वविद्यालयबाट स्नातकोत्तर गर्नुभएको छ । २०३४ सालमा विद्यार्थी फाँटबाट राजनीतिमा प्रवेश गर्नुभएको उहाँले दश महिना काराबास र पटक–पटक गरी दश महिना प्रहरी हिरासतको यातना भोग्नुपरेको थियो । दश वर्ष भूमिगतजीवन बिताउनुभएका कार्की २०४५ देखि नै पार्टीको पूर्णकालिक कार्यकर्ता बन्नुभएको थियो ।

० कुन उद्देश्यले कम्युनिस्ट आन्दोलनमा सहभागी हुनुभएको थियो, के प्राप्त गरियो जस्तो लागेको छ ?
– देशको सामाजिक, आर्थिक र राजनीतिक क्षेत्रमा आमूल परिवर्तन हुने विश्वासका साथ सोही उद्देश्यप्राप्तिका लागि कम्युनिस्ट आन्दोलनमा लागेको हुँ । केही पनि भएन भन्दा गणतन्त्रसम्म ल्याइयो । हामीले खोजेकोचाहिँ जनवादी गणतन्त्र हो । अहिले त गणतन्त्रको नाममा भाँडतन्त्र ल्याएजस्तो भएको छ । यस्तो अवस्था–व्यवस्था आउला भन्ने मैले सोचेको थिइनँ । परिवर्तन गरिन्छ र परिवर्तनले नेपाल र नेपाली जनताको आत्मसम्मानसहितको सुखी एवम् समृद्ध भविष्य सुनिश्चित गरिन्छ भन्ने विश्वासमा म क्रियाशील भएको हुँ ।

० तर, जनताले कम्युनिस्ट राजमा झन् बढी दुःख पाए भन्ने ठान्नुभएको छ कि छैन ?
– सिद्धान्त त त्यस्तो थिएन, व्यवहारले त्यस्तै देखायो । गणतन्त्र भनिए पनि नेतृत्वको सोच–व्यवहार पूरै सामन्तवादी नै देखियो ।

० कम्युनिस्ट आन्दोलन विकृत हुनुको कारण के होला ?
–आर्थिक र सांस्कृतिक विचलनले यस्तो बनायो । नेतृत्वमा आत्मकेन्द्रित र व्यक्तिवादी प्रवृत्ति देखियो, स्वाधीन र सर्वहितकारी सोच पाइएन । नेतृत्वलाई सामन्तवादी सोचबाट मुक्त गर्न नै सकिएन ।

० कम्युनिस्ट आन्दोलनका गद्दारहरूको नाम लिनुपऱ्यो भने क–कसको लिनुहुन्छ ?
– नामै लिएर त नभनौँ, आदर्शबाट विचलित भएका सबै गद्दार हुन् । केशरजंग रायमाझीदेखि मनमोहन अधिकारीदेखि अहिलेसम्मका नेतृत्वले गद्दारी गर्दै आएको कुरा मैले नमाने पनि सबैले त्यही मान्छन् । बडो लाजमर्दो अवस्थामा पु¥याए कम्युनिस्ट आन्दोलनलाई !

० हिंसात्मक युद्धकालमा तपाईं विभिन्न दलका नेता र अन्य शक्तिकेन्द्रसँग सम्पर्क र संवादमा हुनुहुन्थ्यो, माओवादीबाट क–कसले कस्तो प्रकारको सहयोग लिएका थिए ?
– माओवादीको सहयोग नलिने कोही पनि भएनन्, सबैले सहयोग लिएका थिए । दरबारले पनि आफ्नो रक्षाका लागि माओवादीसँग सहयोगको सम्बन्ध राखेको र माओवादीले पनि आत्मरक्षाका निम्ति दरबारसँग सम्बन्ध बनाएकै हो । गोरखपुरमा माओवादीसँग बनेको सहमतिअनुसार नै एमालेले त्यसबेला ५६ दिनसम्म संसद् अवरुद्ध गरेको थियो । शेरबहादुर देउवाले पनि सत्तामा पुग्नका लागि माओवादीकै सहयोग लिएका थिए । सूर्यबहादुर थापाका छोरा सुनिल र नाति सिद्धार्थ थापासँग माओवादीको राम्रो सम्पर्क थियो । कीर्तिनिधि विष्ट, राजेश्वर देवकोटा, रमेशनाथ पाण्डेलगायतसँग माओवादीले सम्पर्क बढाएको थियो । शेरबहादुर देउवा, प्रदीप गिरी, दुर्गा सुवेदी र खुमबहादुर खड्कासँग पनि राम्रो सम्पर्क र सम्बन्ध बनाइएको थियो ।

० एकातिर राजा वीरेन्द्रसँग गठबन्धन गर्ने, अर्कोतिर त्यसताक संसद्वादी भनिने दलका नेताहरूसँग पनि सम्बन्ध राख्ने, दोहोरो भूमिकाचाहिँ किन नि ?
– छिट्टो सत्ता प्राप्त गर्ने र युद्ध टुङ्ग्याउने इच्छा माओवादी नेतृत्वले राखेको थियो । राजासँग मिलेर दलहरूलाई निषेध गर्दै सत्तामा जाने या दलहरूसँग मिलेर राजालाई निषेध गर्दै सत्तामा पुग्ने भन्ने खेल एकसाथ चलिरहेको थियो । अन्ततः दरबार बाहिरिने गरी खेल अघि बढेको हो ।

० त्यसपछि क्रान्तिको बाँधी भाग पूरा गर्न विप्लवतिर लाग्नुभएको हो ?
– हो, विप्लवको नेतृत्वमा अपूरो क्रान्तिले पूर्णता प्राप्त गर्ने विश्वास मलाई थियो । तर, कार्यनीति अन्यत्रै मोडियो । विप्लवलाई कार्यदिशा मुताबिक कार्यनीति निर्माण गर्न पटकपटक आग्रह गरेको थिएँ तर यहाँ फौजी र छापामार गतिविधिमा नै उद्यत् रहेकोले मैले गत वर्षको केन्द्रीय कमिटीको बैठकमा नै असहमति जनाएको हुँ । तर, अहिलेसम्म मेराबारेमा के भएको छ जानकारी गराइएको छैन । हल्लाअनुसार आत्मसमर्पणकारी भनिएको छ रे, यो उनको गम्भीर दृष्टिभ्रम हो । कुनै बेला पार्टी नराम्रोसँग खाडीमा फसेपछि समीक्षा गर्लान् । उनको यस्तो निर्णयबाट म आफू स्वतन्त्र हुन पुगेको जानकारी सबैलाई गराउन चाहन्छु ।

हुर्नुहोस् अन्तर्वार्ताको भिडियो-



प्रतिक्रिया दिनुहोस !
सम्बन्धित खबरहरु

राष्ट्रिय ध्वजावाहक नेपाल वायुसेवा निगम (नेपाल एयरलाइन्स) को वाइड बडी ए३३० जहाजले मलेशियाबाट १८ वटा नेपाली कामदारको शव नेपाल ल्याएको

आज माघ १० गते, विदेशी सेनासँग नेपाली सेनाले लडाइँ लडेर सबैभन्दा ठूलो जीत हासिल गरेको पहलो युद्ध भएको दिन अर्थात

‘संसद् पुनःस्थापना पहिलो प्राथमिकता’ नेपाली कांग्रेसका महामन्त्री डा. शशाङ्क कोइरालाले मुलुकमा राजनीतिक अवस्था अस्थिर हुँदै गएकाले तोकिएको समयमा निर्वाचन हुने

लमजुङमा निर्माणाधीन २७ मेगावाट क्षमताको दोर्दीखोला जलविद्युत् आयोजनाले हालसम्म ९६ प्रतिशत निर्माण सम्पन्न गरेको छ । हिमालयन पावर पार्टनर लिमिटेड