नेपाल बक्सिङ संघका सदस्य एवं अन्तर्राष्ट्रिय समन्वय संयोजक श्याम अवालेले १३औं सागका लागि थाइल्यान्डमा प्रशिक्षणमा रहेका बक्सिङ खेलाडीहरुको निरीक्षण तथा तयारीका बारेमा जानकारी लिएका छन् ।

अवालेले विगत दुई महिनादेखि प्रशिक्षणमा रहेका २० सदस्यीय नेपाली टोलीको निरीक्षण गर्नुका साथै थाइल्यान्ड बक्सिङ संघलाई धन्यवाद दिदै प्रशंसा पत्र हस्तान्तरण गरेका थिए ।

सो अवसरमा थाइल्यान्डका प्रमुख बक्सिङ प्रशिक्षक सुवानद्वारा नेपाली खेलाडीको उत्कृष्ट भएको बताउँदै नेपाली खेलाडीलाई प्रशिक्षण गराउन पाउँदा खुशी व्यक्त गरेका थिए । यो प्रशिक्षणले दुई राष्ट्रका खेलाडीले एक आपसमा सिक्ने अवसर प्रदान गरेको सुवानले बताए ।

थाइल्यान्डमै रहेर प्रशिक्षण गराइरहेको नेपालका बक्सिङका मुख्य प्रशिक्षक प्रकाश थापा मगरले दुई महिनाको थाइल्यान्डको तालिम निकै फलदायी भएको बताए । प्रशिक्षणका लागि सम्पूर्ण सुविधा भएकाले खेलाडीहरुले उच्च मनोबलका साथ प्रशिक्षण गरेको अनुभव सुनाए ।

खेलाडी भुपेन्द्र थापा मगरले तालिमले सम्पूर्ण खेलाडीको मनोबल उच्च बनाएको बताउँदै यही तुलनामा तालिम लिन सके सागमा अवश्य मेडल जित्ने विश्वास व्यक्त गरे ।

थाइल्यान्ड बक्सिङ संघका निर्देशक क्राइताच काइकातेले नेपाल र थाइल्यान्डबीच लामो सम्बन्ध रहेको स्मरण गराउँदै नेपाली बक्सिङको विकासमा सदैव सहयोग रहने प्रतिबद्धता जनाए ।