पत्रकार शालिकराम पुडासैनी मृत्यु प्रकरणमा पक्राउ परेका रवि लामिछानेसहित तीनजनाविरुद्ध थप अनुसन्धान गर्न पुनः ५ दिनको म्याद थप गरिएको छ । पहिलो चरणको पाँच दिनको म्याद सकिएपछि चितवन प्रहरीले थप समय माग गर्दै मंगलबार तीनैजनालाई अदालतमा पेस गरेको थियो ।
प्रहरीको मागबमोजिम जिल्ला अदालत चितवनले लामिछानेसहित न्यूज २४ टेलिभिजनमा कार्यरत युवराज कँडेल र रुकु भनिने नर्स अस्मिता कार्कीलाई हिरासतमा राख्न थप ५ दिनको म्याद दिएको हो ।
अदालतले म्याद थपेसँगै अब उनीहरू तीनैजना (रवि, युवराज र अस्मिता) ले थप पाँच दिनसम्म प्रहरी हिरासतमै रहनुपर्ने भएको छ ।
पत्रकार शालिकराम पुडासैनीको आत्महत्या दुरुत्साहन अभियोगमा अनुसन्धानका लागि उनीहरू तीनैजनालाई काठमाडौंबाट पक्राउ गरी प्रहरीले गत बिहीबार चितवन लगेको थियो । आत्महत्या गर्नुअघि मृतक पुडासैनीले आफूलाई आत्महत्या गर्न बाध्य पारेको भन्दै उनीहरूको नाम लिएको भिडियो सार्वजनिक भएपछि अनुसन्धानका लागि उनीहरूलाई पक्राउ गरिएको प्रहरीको भनाइ छ ।
जिल्ला प्रहरी कार्यालय चितवनले अस्मिता र युवराजको साबिती बयान लिइसकेको जनाएको छ । रविको भने मंगलबार बिहान मात्र बयान लिने क्रम शुरु भएको प्रहरीले जनाएको छ । उनको बयान लिने क्रम नसकिएको भन्दै प्रहरीले समय थपको माग गरेपछि अदालतले सो समय दिएको हो ।
उनीहरूलाई एकैपटक पाँच दिनभन्दा बढी समय थप गर्दा रविको समर्थनमा भइरहेका प्रदर्शन अझ प्रभावित हुने कुरालाई मध्यनजर गर्दै पाँच दिन मात्र समय थप गरिएको प्रहरी स्रोतको भनाइ छ ।
पत्रकार पुडासैनी साउन २० गते चितवनको कंगारु होटेलको २०२ नम्बर कोठामा झुन्डिएरको अवस्थामा मृत फेला परेका थिए ।
प्रतिक्रिया