सत्तारुढ नेपाल कम्युनिस्ट पार्टी नेकपाकी सांसद तथा संसदीय दलकी सचेतक शान्ता चौधरी नयाँ बानेश्वरस्थित रत्नराज्य स्कुलमा ११ कक्षामा भर्ना भएकी छिन् ।

दाङबाट यसै वर्ष एसईई पास गरेकी सांसद चौधरीले अस्ति (सोमबार) सो स्कुलमा कक्षा ११ मा नाम लेखाएकी थिइन् । आज बुधबारबाट कक्षासमेत लिएकी उनको रोलनम्बर ६२ रहेको छ ।

उनकी छोरीले पनि उनीसँगै यसपालि एसईई गरेकी हुन् भने छोराले १२ को पढाइ सकाइसकेका छन् ।
विद्यालयमा भर्ना भएपछि उनलाई विद्यालय व्यवस्थापन समितिले विद्यार्थी प्रतिनिधिका रूपमा व्यवस्थापन समिति सदस्यसमेत मनोनीत गरेको छ ।

सानैदेखि जमिनदारको घरमा कमलरी बसेकी चौधरीले पढ्ने अवसर पाएकी थिइनन् । मुक्त कमलरीको रूपमा ०६४ मा सांसद बनेपछि हस्ताक्षरसमेत गर्न नजान्दा समस्या भोगेकी चौधरीले त्यसपछि पढाइलाई महत्व दिन थालेकी थिइन् ।