८ कार्तिक २०७७, शनिबार

नेपाल रिपब्लिक पार्टीद्वारा मोदी सरकारको कदमको स्वागत

  प्रकाशित मिति
२८ श्रावण २०७६, मंगलवार १३:०८


मित्रराष्ट्र भारतमा भारतीय जनता पार्टीको सरकारले संविधानको धारा ३७० र उपधारा ३५ (ए) को प्रावधान हटाई जम्मु–कस्मिर तथा त्यसबाट अलग्याइएको लद्दाख क्षेत्रलाई केन्द्रशासित प्रदेश बनाएको छ । प्रधानमन्त्री नरेन्द्र मोदी एवम् उनको टिमको यस ऐतिहासिक तथा क्रान्तिकारी कदमको विश्वभरका लोकतान्त्रिक मुलुकहरूले स्वागत र सराहना गरेका छन् ।

यसै सिलसिलामा नेपाल रिपब्लिक पार्टीले एक विज्ञप्ति प्रकाशित गर्दै भारत सरकारको उक्त कदमको स्वागत गरेको छ । सो पार्टीका प्रेसिडेन्ट सिद्धार्थ गौतमले विज्ञप्तिमार्फत धेरै पहिले भइसक्नुपर्ने यो कार्य दृढतासाथ सम्पन्न गरेको भन्दै भारतको सत्तारुढ भारतीय जनता पार्टीलाई बधाई ज्ञापन गरेका छन् । उनले आफ्नो विज्ञप्तिमा अगाडि भनेका छन्, ‘एउटै देशभित्रका बेग्लै झन्डा, संविधान र नेतृत्व कायम रहनु र देश विखण्डनका नारा तथा गतिविधिले प्रश्रय पाउनु कुनै पनि सम्प्रभुसत्तासम्पन्न देशका लागि स्वीकार्य हुन सक्दैन । भारत सरकारको यस कदमले भारतलाई यस अवस्थाबाट मुक्त गरेको छ र राष्ट्रिय एकीकरणको कामलाई सच्चा अर्थमा पूर्णता प्रदान गरेको छ ।’

राष्ट्रिय सम्प्रभुता, अखण्डता र कानुनी राज्यको हिमायती कुनै पनि लोकतान्त्रिक मुलुकले यस कदमको समर्थन गर्नुपर्छ भन्दै विज्ञप्तिमा नेपाल सरकारको रवैयाप्रति रोष प्रकट गरिएको छ । उनले भनेका छन्, ‘अनावश्यक कुरामा लम्बे–चौडे वक्तव्य दिएर नथाक्ने वर्तमान कम्युनिस्ट सरकारले मित्रराष्ट्र भारतका शत्रुहरूलाई सहयोग पुग्ने गरी यस मामिलामा धारण गरेको मौनता रहस्यमय मात्र होइन, घोर आपत्तिजनकसमेत छ । नेपाल सरकारको यो मौनता एउटै देशभित्र दुई बेग्लै झन्डा, फरक संविधान र फरक नेतृत्व तथा देश विखण्डनका गतिविधिको सक्रिय मौन समर्थन पनि हो, त्यसैले यस घटनाप्रतिको सरकारी मौनता सत्तारुढ कम्युनिस्ट पार्टीको राष्ट्रघाती, जनविरोधी प्रवृत्तिको मुखर विज्ञापन हो ।’

प्रादेशिक विभेद, साम्प्रदायिकता र राष्ट्रविखण्डनको विपक्षमा उभिने नेपाल सरकारको नैतिक धरातल यसले पूर्णतः ध्वस्त पारेको नेपाल रिपब्लिक पार्टीले ठहर गरेको छ । राष्ट्रिय सम्प्रभुता र अखण्डताका पक्षधर सम्पूर्ण नेपाली जनता भारत सरकारको कदमको समर्थनमा रहेको दाबी गर्दै मोदी सरकारको सो कदमका निम्ति जम्मु–कस्मिर र लद्दाखसमेत सम्पूर्ण भारतीय जनताप्रति गौतमले बधाई प्रकट गरेका छन् ।



प्रतिक्रिया दिनुहोस !
सम्बन्धित खबरहरु

लुम्बिनी प्रदेशको हिउँदे अधिवेशन प्रादेशिक राजधानी देउखुरीमा राख्नेबारे गृहकार्य शुरु भएको छ । स्थायी राजधानीको टुंगो लागिसकेका अवस्थामा प्रदेशसभा बैठक

सत्तारुढ नेपाल कम्युनिष्ट पार्टी (नेकपा)को कर्णाली प्रदेश संसदीय दलको बैठकले मुख्यमन्त्रीसमेत रहेका दलका नेता महेन्द्रबहादुर शाहीविरुद्ध दर्ता भएको अविश्वासको प्रस्ताव

सन्त नेता कृष्णप्रसाद भट्टराईका खास हिमायतीमध्येका एक नेता, पूर्व मन्त्री एवम् नेपाली काङ्ग्रेसका केन्द्रीय सदस्य डा. नारायण खड्कामाथि आगामी महाधिवेशनमा

‘मल्ल युद्ध’ गरेर प्रधानमन्त्री केपी शर्मा ओलीलाई परास्त गर्न नसकिने देखिएपछि ‘माओवादी’ नेता प्रचण्ड ‘छलयुद्ध’ गरी केपीलाई सिध्याउने रणनीतिक चालमा