विभिन्न व्यक्तिको नाममा फर्म दर्ता गरेर नक्कली बिजक तयार एवं बिक्री गरी एक समूहले करिब तीन अर्ब रुपैयाँ राजस्व छलेको पाइएको छ ।

सुनसरीको इनरुवा नगरपालिका–९ बलाहा घर भई हाल भक्तपुरको ठिमी बस्ने गोपालप्रसाद भट्टराईसहित १५ जनाले कर छली गरी ठगी गरेको राजस्व अनुसन्धान विभागले जनाएको छ । उनीहरूविरुद्ध रु. दुई अर्ब ९८ करोड ५७ लाख ५७ हजार ११५ बिगो कायम गरी बिगोको दुई गुणा जरिवाना र तीन वर्ष कैद सजायको माग दाबीसहित काठमाडौं जिल्ला अदालतमा बिहीबार मुद्दा दायर गरिएको विभागका महानिर्देशक दीर्घराज मैनालीले जानकारी दिए ।

उनीहरूले विनोद धमला, सन्तोषकुमार कार्की, मेघबहादुर श्रेष्ठ, धनबहादुर भोम्जन, भरतबहादुर दुम्जन, विमल पुतुवार, नारायण कोइराला (दमाईं) र पार्वती सूचीकारका नाममा आठवटा फर्म दर्ता गरेर नक्कली बिजक तयार गरी राजस्व छलेको अनुसन्धानमा खुलेको मैनालीले जानकारी दिए ।

उक्त फर्मबाट गोपालप्रसाद भट्टराई र रिम्बरध्वज कार्कीले वस्तु तथा सेवाको खरिदबिक्रीको कारोबार नै नगरी झुटा बिजक बनाएर राजस्व चुहावट गरेको खुल्न आएको छ ।

यस्ता फर्महरूले बिजक मात्र जारी गर्ने गरेको, वस्तु तथा सेवाको वास्तविक खरिद–बिक्री नगरी झुटा तथा नक्कली बिजक जारी गरेको र त्यसबाट प्राप्त हुने लाभमा सबैको समानुपातिक हिस्सेदारी भएकाले राजस्व चुहावट (अनुसन्धान तथा नियन्त्रण) ऐन, २०५२ बमोजिमको कसुर गरेको विभागको दाबी छ ।

राजस्व चुहावटमा फर्मका प्रोपाइटर भट्टराई र कार्कीको मुख्य संलग्नता देखिएकाले कर छली गरेको रकमको बिगो असुल गरी बिगोको दोब्बरसम्म जरिवाना तथा तीन वर्षसम्म कैद सजायको माग गरिएको छ ।

कर सहयोगी ललितराज कन्दङ्वा र गौरी मैनालीले राजस्व चुहावटमा सहयोग गरेको तथा लेखापरीक्षक जगन्नाथ गुरुङ, शरणबहादुर खड्का र टंकनाथ नेपालले गलत लेखा परीक्षण प्रतिवेदन तयार गरेकाले भट्टराई र कार्कीलाई हुने सजायको आधा सजायको माग दाबी गरिएको महानिर्देशक मैनालीले जानकारी दिए । उक्त घटनामा विभागले चार महिनाअघिबाट अनुसन्धान थालेको थियो ।

यसअघि विभागले ८१ मुद्दामा रु. १८ अर्ब ३२ करोडको बिगो तथा जरिवाना र तीन वर्ष कैद सजायको माग दाबीसहित २३८ जनाविरुद्ध विभिन्न अदालतमा मुद्दा दायर गरिसकेको छ ।

rss