थपिएको मितिमा पनि महाधिवेशन नहुने निश्चित भएपछि नेपाल विद्यार्थी सङ्घ केन्द्रीय समितिका कतिपय पदाधिकारीले राजीनामा दिएका छन् । समयमै महाधिवेशन नभएको भन्दै सहमहामन्त्रीद्वय ललिता सुनार र हरिहर शर्माले राजीनामा दिएका हुन् ।

उनीहरुका अलावा केन्द्रीय सदस्य पम्फा गान्धारी, कल्पना खड्का, लिखितेन्द्र श्रेष्ठ, सुनिता अधिकारी, भोला नेपाल, शारदा लामा, दीपेशराज भण्डारीलगायत ४५ जनाले राजीनामा दिएका बताइएको छ । काङ्ग्रेसका वरिष्ठ नेता रामचन्द्र पौडेलसमक्ष उनीहरुले सामूहिक रुपमा राजीनामा पत्र बुझाएका हुन् ।

महाधिवेशन नगरी सङ्घका अध्यक्ष नैनसिंह महरले आफ्नो पदावधि मात्र लम्ब्याएको, क्याम्पसमा सङ्गठन निर्माण गर्न नसकेकोलगायत आरोप उनीहरुले लगाएका छन् । जतिपटक म्याद थप गरे पनि महाधिवेशन गराउन नसक्ने ठान्दै सामूहिक राजीनामा दिएको सहमहामन्त्री शर्माको भनाई छ ।

महर नेतृत्वबाट महाधिवेशन सम्भव नभएपछि वर्तमान कार्यसमितिको औचित्य र सान्दर्भिकता सकिएको आरोप पनि उनले लगाएका छन् ।

‘विधानअनुसार तदर्थ समिति गठन गरी महाधिवेशन गर्नुपर्छ,’ केन्द्रीय सदस्य कल्पना खड्का भन्छिन् ।

ज्ञात रहोस्, यसअघि पनि सङ्घका नौ पदाधिकारीले राजीनामा दिएका थिए । वर्तमान कार्यसमितिले १२औँ महाधिवेशन गर्न नसक्ने निष्कर्षसहित रउपाध्यक्षहरू पुष्पाकुमार शाही, सञ्जय यादव, विकास केसी, महामन्त्री सरोजकुमार थापा, सहमहामन्त्री प्रेमराज जोशी, प्रकाश घिमिरे र अच्युतराज कलौनीले सभापति देउवासामु राजीनामा बुझाएका थिए ।