दुबई अन्तर्राष्ट्रिय जुनियर ब्याडमिन्टनका विजेता प्रिन्स दाहालले राष्ट्रपति कप जुनियर अन्तर्राष्ट्रिय ब्याडमिनटन प्रतियोगितामा दोहोरा जित हात पार्दै उपाधि जितेका छन् । प्रिन्स यू–१९ र यु–१५ दुवैतर्फ विजयी भएका हुन् । उनले फाइनलमा यू–१९ मा उच्च वरीयताका प्रफुल महर्जनलाई २१–८ र २१–१० ले पराजित गर्दै उपाधिमाथि कब्जा जमाएका हुन् । त्यस्तै, यू–१५ मा उनले म्यानमारका ज लिन थुलाई २१–१५, १७–२१, २१–९ ले पराजित गर्दै दोहोरो उपाधि जितेका हुन् ।

नेपाल ब्याडमिन्टन संघको तत्वाधान तथा मोरङ जिल्ला ब्याडमिन्टन संघको आयोजनामा भएको प्रतियोगिताको महिला यू–१९ मा उच्च वरीयताकी जेशिका गुरुङले रशिला महर्जनमाथि २४–२२, २१–१४ ले पाखा लगाउंदै उपाधि जितिन् । त्यस्तै उनले रशिलासँग मिलेर यू–१९ गल्र्स जोडीतर्फ पनि उपाधि हात पारिन् । जेशिका र रशिलाको जोडीले शिमा राजवंशी र नीता लम्साललाई २१–१२, २१–३ ले पाखा लगाएका थिए ।

सहिद रंगशालास्थित कभर्डहलमा भएको प्रतियोगिताको यू–१९ पुरुष युगलतर्फको खेलमा म्यानमारका ज लिन थु र थु रिनको जोडीले प्रफुल महर्जन र रुकेश महर्जनको जोडीमाथि १९–२१, २१–१८ र २१ –१७ को जित निकाल्दै उपाधि जितेको थियो ।

यू–१५ छात्रातर्फको खेलमा उच्च वरीयताकी रशिला महर्जनले स्मृति राईलाई २१–७, २१–३ ले पराजित गर्दै उपाधि हात पारिन् । विजयी शीर्ष तीन स्थान हात पार्ने खेलाडीले क्रमशः नगद २० हजार, १० हजार र ५ हजार नगदसहित ट्रफी र प्रमाणपत्र प्राप्त गरेका थिए । विजयी खेलाडीलाई विराटनगर महानगरपालिकाका मेयर भीम पराजुलीलगायतले पुरस्कार बितरण गरेका थिए ।