वरिष्ठ पत्रकार बुढाथोकी प्रेस काउन्सिल नेपालको सदस्य नियुक्त

नियुक्तिको स्वागत र प्रशंसा





लामो समयदेखि (करिव चार दशक अवधि) निरन्तर पत्रकारितामा सक्रिय रहँदै आउनुभएका वरिष्ठ पत्रकार गोपाल बुढाथोकीलाई सरकारले प्रेस काउन्सिल नेपालको सदस्य नियुक्त गरेको छ । सूचना, सञ्चार तथा प्रविधिमन्त्री गोकुल बास्कोटाले साँघु साप्ताहिकका सम्पादक प्रकाशकसमेत रहनुभएका बुढाथोकीलाई मन्त्रीस्तरीय निर्णय गर्दै चार वर्षका लागि सदस्य नियुक्त गर्नुभएको हो ।

काउन्सिलमा सम्पादक/प्रकाशकको तर्फबाट एक सदस्य रिक्त रहेको थियो । सोही स्थानमा पत्रकार आचारसंहिता, पत्रकारिताका सिद्धान्त र पत्रकारका पेशागत अधिकारका सवालमा विभिन्न कालखण्डमा विशेष भूमिका खेल्दै आउनुभएका बुढाथोकीलाई नियुक्त गरिएको हो ।

पत्रकार महासंघका पूर्वउपाध्यक्ष र सल्लाहकार समेत रहनुभएका वरिष्ठ पत्रकार बुढाथोकी यसअघि २०६५ सालमा पनि काउन्सिलको सदस्य रहनुभएको थियो ।

अनेक उतारचढाव र जेलनेल समेत खेपेर पनि अबिच्छिन्न लामो अवधि पत्रकारितामा सक्रिय रहेका अत्यन्त कम पत्रकारमध्ये बुढाथोकी एक पर्नुहुन्छ । उहाँको नियुक्तिलाई ‘राइट म्यान राइट प्लेस’ भनी स्वागत गर्दै मन्त्री बास्कोटाको समेत प्रशंसा गरिएको छ । पछिल्लो समय विभिन्न कारणले सुस्त रहेको ठानिएको काउन्सिलमा बुढाथोकीको नियुक्तिपछि सो निकायले चुस्त गति पक्रिने अपेक्षा गरिएको छ ।

प्रतिक्रिया