पछिल्लोपटक सन् १९८४ मा सिउल एसियाली खेलकुद प्रतियोगितामा सहभागिता जनाएको नेपालको भलिवल टोलीले ३२ वर्षपछि पुनः एसियाडमा प्रतिस्पर्धा गर्न पाउने भएको छ । सो कुराको जानकारी नेपाल भलिबल संघले गराएको छ ।

आगामी भदौ २ गतेदेखि इण्डोनेसियाको राजधानी जाकार्तामा आयोजना हुन गैररहेको १८ औं एसियाली खेलकुदमा भलिबलको सहभागिताको लागि केहि महिना पहिले राष्ट्रिय खेलकुद परिषद र नेपाल ओलम्पिक कमिटीले आयोजक कमिटीलाई पत्राचार गरेको थियो ।

१८ औं एसियाली खेलकुदको तयारी समितिले नेपाली भलिबल टोलीलाई एसियाडमा सहभागिताको वारेमा बैशाख ११ गते मंगलवार राखेप र एनओसीमा पत्राचार गरेको थियो ।

नेपाललाई एसियाडमा सहभागी गराएपछि नेपाल भलिबल संघका महासचिव जितेन्द्र चन्दले खुशी प्रकट गरेका छन् । चन्दले ३२ बर्षपछि पुनः एसियाडमा प्रतिस्पर्धा गर्ने अवसर प्राप्त भएको भन्दै त्यसलाई सार्थक तुल्याउन सम्वन्धित निकाय लगायत सरकारले पनि विशेषरुपमा चासो राख्नुपर्ने बताए ।

पुरुष भलिबल टीमले एसियाडमा सहभागिता जनाउने भएपनि महिला टीमलाई उक्त अवसर प्राप्त भएको छैन् । त्यस्तै नेपालले एसियाडमा सहभागिता जनाउने खेलको टुङ्गो लगाइसकेको अवस्थामा भलिवलले सहभागिता जनाउन पाउँछ या पाउँदैन त्यो केहि समय प्रतिक्षा गर्नु पर्ने भएको छ ।