आईसीसी डिभिजन–२ मा उत्कृष्ट प्रदर्शन गरेर डिभिजन वानमा उक्लिएको नेपाली क्रिकेट टोलीले विश्वकप छनोट चरणमा अपेक्षाअनुसारको प्रदर्शन गर्न सकेन । विश्वकप छनोट चरणका तीनवटा खेलमा लगातार पराजित भएको नेपालले आफ्नो अन्तिम खेलमा हङकङलाई पराजित गरेर आफ्नो साख बचाएको थियो । हङकङलाई पराजित गरेकै कारण एकदिवसीय मान्यताका लागि नेपालले पपुवा न्युगिनीसँग खेल्ने अवसर पाएको थियो । पपुवा न्युगिनीलाई नेपालले पराजित गरे पनि नेपाललाई एकदिवसीय मान्यता प्राप्त गर्न नेदरल्यान्डले हङकङलाई पराजित गर्नुपर्ने बाध्यता थियो । भाग्यमानी नेपाल, नेपालले जस्तो सोचेको थियो त्यस्तै परिणाम आयो । नेदरल्यान्डले हङकङलाई पराजित गर्दै नेपाललाई एकदिवसीय क्रिकेट खेल्ने राष्ट्रको सूचीमा पारिदियो । यदि उक्त खेलमा हङकङ विजयी भएको भए नेपालले यो ऐतिहासिक उपलब्धिको अनुभूति गर्न पाउने थिएन । साँचो रूपमा भन्नुपर्दा नेदरल्यान्ड धन्यवादको पात्र हो । यसर्थमा कि नेपालले यो भ्रमणमा दुई खेलमा जित र चार खेलमा पराजय भोगेको छ ।

सन् १९९६ बाट अन्तर्राष्ट्रिय क्रिकेट खेल्न थालेको नेपालले यो ऐतिहासिक उपलब्धि २२ वर्षपछि हासिल गरेको हो । डिभिजन–५ बाट अन्तर्राष्ट्रिय यात्रा थालेको नेपाल डिभिजन–१ सम्म पुग्न सफल भएको थियो । यही प्रदर्शनका आधारमा नेपालले सन् २०१४ मा आयोजित ट्वान्टी–२० विश्वकपमा सहभागिता जनाउने अवसर पाएको थियो । पहिलो विश्व अनुभवमा नेपालले कुनै खेलमा जित हासिल गर्न नसके पनि उत्कृष्ट प्रदर्शन गरेर क्रिकेट फ्यानहरूको मन जित्न सफल भएको थियो । यतिबेला दश राष्ट्र सम्मिलित प्रतियोगितामा आठौँ स्थान हासिल गरेर नेपालले एकदिवसीय मान्यता प्राप्त गरेको हो । नेपालले एकदिवसीयमा मान्यता प्राप्त गरेसँगै पुछारका दुई राष्ट्र पपुवा न्युगिनी र हङकङ घटुवा भएर डिभिजन–२ मा झरेका छन् । नेपाल अब आईसीसीद्वारा मान्यता प्राप्त १६ राष्ट्रको सूचीमा यो उपलब्धि हासिल गर्ने कान्छो राष्ट्र बनेको छ । अब नेपाललाई चार वर्षसम्म अर्थात् २०२२ सम्म यो मान्यता प्राप्त हुनेछ ।

नेपालले एकदिवसीय मान्यता प्राप्त गरेसँगै अहिले चौतर्फी नेपाली क्रिकेटको चर्चा चलिरहेको छ । क्रिकेटप्रेमीको मनमस्तिष्कमा एकदिवसीयको भूत सवार भएको छ । नेपालले पनि अब टेस्ट मान्यता प्राप्त राष्ट्रहरू भारत, पाकिस्तान, अस्ट्रेलिया, न्युजिल्यान्ड, वेस्टइन्डिज, दक्षिण अफ्रिका, बंगलादेश, श्रीलंका, जिम्बावे, अफगानिस्तान र आयरल्यान्डसँग एकदिवसीय शृङ्खला खेल्न पाउने भ्रम पैदा भएको छ । साँचो रूपमा भन्नुपर्दा नेपालले यी टेस्ट खेल्ने राष्ट्रबाहेक अन्य राष्ट्रहरूसँग मात्र एकदिवसीय क्रिकेट खेल्ने हो । त्यसमा डिभिजन–१ मा रहेका र एकदिवसीय मान्यता प्राप्त गरेका नेपालजस्तै अन्य मुलुकका टिमसंग नेपालले प्रतिस्पर्धा गर्ने हो । यसबाहेक नेपालले एसिया कप क्रिकेट प्रतियोगिता खेल्न पाउँछ । जहाँ भारत, पाकिस्तान, श्रीलंका र बंगलादेशको सहभागिता रहन्छ । नेपालले एकदिवसीय मान्यताप्राप्त गरेपछि अब आईसीसीले चार वर्षको जस्तो क्यालेन्डर बनाउँछ सोहीअनुरूप नेपालले खेल्ने हो ।
यतिबेला नेपाल क्रिकेट सङ्घ (क्यान)लाई आईसीसीले निलम्बन गरेको अवस्था छ । निलम्बन फुकुवा गर्ने प्रयास जारी रहे पनि अहिलेसम्म त्यसमा सफलता प्राप्त भएको छैन । आईसीसीको तालिकाअनुसार विधान संशोधन भए आगामी जुनमा हुने साधारणसभाले नेपालमाथि लागेको प्रतिबन्ध हटाउन सक्छ ।