प्रदेश सांसदको सेवा, सुविधा के–कस्तो हुने भन्ने यकिन भइनसक्दै गोरखाको निर्वाचन क्षेत्र नं २ अन्तर्गत प्रदेशसभा क्षेत्र (ख)बाट विजयी हुनुभएका सांसद तथा नेपाली कांग्रेसका नेता प्रकाशचन्द्र दवाडीले प्रदेशले उपलब्ध गराउने पारिश्रमिक निर्वाचन क्षेत्रभित्र सामाजिक कार्यमा खर्च गर्ने घोषणा गर्नुभएको छ ।

गोरखामा पत्रकार सम्मेलन आयोजना गरी सांसद दवाडीले जानकारी दिएअनुसारसांसदलाई राज्यले उपलब्ध गराउने सेवा तथा सुविधा व्यक्तिगत रुपमा उहाँले प्रयोग गर्नुहुने छैन । सांसद दवाडीले आफूलाई जिताएर पठाउनुभएका मतदाता र निर्वाचन क्षेत्रमा हुने सामाजिक कार्यमा उक्त रकम खर्च गर्ने घोषणा गर्नुभयो ।

गोरखाको सिरानचोक, अजिरकोट र सुलिकोट गाउँपालिकाबाट दवाडी निर्वाचित हुनुभएको थियो । सिरानचोकमा आठवटा, अजिरकोटमा पाँचवटा र सुलिकोटमा आठवटा वडा रहेका छन् । प्रत्येक महिनाको पारिश्रमिक फरकफरक वडामा सामाजिक कार्यमा खर्च गर्न सहयोग गर्ने दवाडीले जानकारी दिनुभयो ।

‘जनताको जीवनस्तर उकास्न सहयोग गर्छु, सामाजिक सेवामा तल्लीन रहन्छु र सधैँ जनताकै सेवामा रहन्छु भन्ने अठोट गर्दै जनतासँग भोट मागेर विजयी भएँ’ दवाडीले भन्नुभयो, ‘आफूले पाउने सेवा सुविधा जनताकै लागि समर्पित गर्ने इच्छा हो ।’

गोरखामा दवाडी राजनीतिक नेताको रुपमा भन्दा समाजसेवीका रुपमा चिनिनुहुन्छ । लामो समयदेखि उहाँले गरिब तथा जेहेन्दार विद्यार्थीलाई छात्रवृत्ति उपलब्ध गराएर शिक्षा क्षेत्रमा योगदान पुर्‍याउँदै आउनुभएको छ ।
तस्बिर रासस