मध्य प्रदेशको डायमण्ड फुटबल एकाडेमीलाई ४–० को भारी गोल अन्तरले पाखा लगाउँदै विभागीय टोली एपीएफ झापाको शिवसताक्षीमा जारी दोस्रो संस्करणको सताक्षी गोल्डकप फुटबल प्रतियोगिताको अन्तिम ८ मा प्रवेश गरेको छ ।
स्थानिय गणेशमान सिंह अध्ययन प्रतिष्ठानको मैदानमा बुधबार भएको खेलमा डायमण्ड फुटबल एकाडेमीलाई हराउदै एपीएफ प्रतियोगिताको क्वाटर फाईनलमा प्रवेस गरेको हो । अव सेमिफाइनल प्रवेशका लागि एपिएफले नेपाल आर्मीको सामना गर्नुपर्ने छ ।
सुरुवातदेखि नै आक्रमक बनेको एपीएफले गोलको खाता खोल्न भने आधा घन्टा सम्म संघर्ष गर्नुप¥यो । एपीएफका लागि पहिलो गोल रुपबहादुर लामाले गरे । नविन लामाको कर्नर किकलाई रुपबहादुरले हेडमार्फत सुन्दर ढंगले जाली चुमाए ।
एपीएफले दोस्रो हाफको २३ औँ मिनेटमा गोल थप्दै गोलअन्तर २–० बनायो । श्याम नेपालीले एक्लै बल अगाडि बढाउँदै आकर्षक ढंगले गोल गरे । ३१ औँ मिनेटमा एपीएफका रञ्जन बिष्टले गोल गर्दै गोलअन्तर ३–० बनाए । ४० औँ मिनेटमा नविन लामाले गोल गर्दै एपीएफका लागि ४–० को स्पष्ट जित सुनिश्चित गरे ।
खेलको म्यान अफ द म्याच एपीएफका रुपबहादुर लामा घोषित भए । उनलाई नगद १० हजार रुपैयाँ प्रदान गरियो । प्रतियोगिताअन्तर्गत बिहीबार हुने खेलमा आयोजक सतासीधाम स्पोर्टिङ क्लब र चर्च ब्वाइज काठमाडौँबीच प्रतिस्पर्धा हुने छ ।
खेलमा भारत तर्फका दुई खेलाडी घाईते भए । गोल किप्पर अभिजित रोय र राईमन चन्द्रदास को खुट्टामा चोट लागेको छ । उनिहरुको स्थानिय पुर्नजिवन हेल्थ केयर सन्टरमा उपचार हुन नसकेपछि थप उपचारका लागि विर्तामोडको विएण्सी अस्पताल लगिएको छ ।
– रेजिना
प्रतिक्रिया