नेपाली बजारमा भन्दा भारतीय बजारमा दूधको मूल्य बढी पाउने भएपछि दक्षिणी झापाका दूध व्यवसायी दूध बिक्रीका लागि भारतीय बजारमा पुग्ने गरेका छन् । कृषकबाट ४० रुपैयाँमा खरिद गरेको दूध डेरीमा दिँदा ३८ देखि ३९ रुपैयाँ मात्र पाइने तर त्यही दूध भारतीय बजारमा पु¥याउँदा प्रतिलिटर ३० देखि ३५ भारतीय रुपैयाँमा बिक्री हुने दुग्ध व्यवसायी पुण्यप्रसाद पौडेलको भनाई छ ।

किसानले उत्पादन गरेको दूध संकलन गरी दैनिक १५० लिटर दूध आफूले भारतीय बजारमा लगी बिक्री गर्ने गरेको झापा गाउँपालिका–६ का पौडेलले बताए । कनकाई नगरपालिकाको सुरुङ्गास्थित अमृत दुग्ध विकास संस्थामा काम गर्दागर्दै जागिर छाडेर पौडेलले दूध बेच्न थालेका हुन् ।

झापाको दक्षिणी भारतसँग सीमा जोडिएका घेरावारी, शरणामती, कुमरखोद, केचना, बनियानीलगायत कृषक दूध बेच्न भारतीय बजार धाउने गरेका छन् ।

झापामा आर्थिक वर्ष ०७२/७३ मा चार अर्ब ५० करोड रुपैयाँ बराबरको दूध उत्पादन भएको जिल्ला पशुसेवा कार्यालयका सूचना अधिकारी कुमारसिंह खत्रीले जानकारी दिए भने उत्पादित दूधको ८० प्रतिशत जिल्लामै खपत हुने गरेको जानकारहरु बताउँछन् ।

– रेजिना गौतम