राष्ट्रिय खेलकुद परिषद् कर्मचारी सङ्घका अध्यक्ष रञ्जन थापाको चर्तीकला हेर्दा उनी नेपाली काङ्ग्रेसका उपल्लो दर्जाको नेताको भएको भान हुन्छ । सरकार परिवर्तनसँगै उनीमा आएको परिवर्तनको विश्लेषण गर्दा उनको धाक कुनै मन्त्रीभन्दा कम छैन । अहिले उनको दिनचर्या भनेकै मन्त्री क्वार्टर धाउनु र खेलकुदबारे अनावश्यक टीका–टिप्पणी र सल्लाह दिनमै बितिरहेको छ । उनको यो हर्कतबाट अहिले राखेप कर्मचारी सङ्घका पदाधिकारीहरूसमेत आहत र आजित भएका छन् । आफ्नो हैसियत के हो ? त्यो बिर्सिएका थापा अहिले खेलकुदमन्त्रीसँग साँठगाँठ गरी सदस्यसचिव विष्टलाई फाल्ने खेलमा समेत लागेका छन् ।
रञ्जन थापाको हैसियत सबैलाई थाहा छ । उनी हक्की खेलका सहायक प्रशिक्षक अर्थात् राखेपका सहायकस्तरका कर्मचारी मात्रै हुन् । थापाको व्यक्तित्व योभन्दा माथि छैन । तालिम तथा प्रशिक्षण विभागका प्रमुख नवीन उप्रेतीको आशीर्वादले राखेप कर्मचारी सङ्घको अध्यक्ष बने पनि अहिले उनको कार्यकाल सकिइसकेको छ । अहिले उनी म्यादी अध्यक्ष मात्रै हुन् । तर, थापाको गतिविधि हेर्दा काङ्ग्रेस पार्टीको अध्यक्षभन्दा कम छैन । अन्यथा काङ्ग्रेसबाट राखेपमा नियुक्त भएका बोर्ड सदस्यलाई कदापि धम्क्याउने कार्य गर्ने थिएनन् । प्राप्त जानकारीअनुसार थापाले ती सदस्यलाई फिर्ता बोलाउन पार्टीका नेताको कान फुकेको पनि खुलासा भएको छ । उनको यो हर्कतको पर्दाफास भएपछि अहिले बोर्ड सदस्य र थापाबीच पानी–बाराबार र बोलचाल बन्द छ, । उनको यो चुरिफुरी देखेर आजभोलि उप्रेती थाप्लोमा हात राखेर आफैँलाई सरापिराखेका छन्– मलाई कुन जुनीको पाप लाग्यो, रञ्जनलाई अध्यक्ष बनाएँ ।
आफूलाई काङ्ग्रेसको कुनै नेताभन्दा कम नठान्ने थापा हालै सम्पन्न काङ्ग्रेसको महाधिवेशनमा बुथ कमिटीबाटै पराजित भएका थिए । तैपनि उनी आफूलाई ठूलै स्वघोषित नेता भन्न छाडेका छैनन् । गत साता सम्पन्न राखेपको ५३औँ वार्षिक उत्सवको समापन समारोहमा थापाले यस्तै सर्मनाक कार्य गरेका थिए । जुन …लाई भन्दा देख्नेलाई लाज भएको थियो । थापालाई पुरस्कार वितरणका लागि कसैले नबोलाए पनि उनी आफैँ उठेर सदस्यसचिव विष्टसँगै पुरस्कार बाँड्न थालेका थिए । उनको यो छुद्र हर्कतपछि आक्रोशित सङ्घका एक पदाधिकारी भन्दै थिए– यो त अति भो । अब मौनता साँध्नु भनेको खति व्यहोर्नु हो, उहाँको व्यवस्थापन गर्नपट्टि अब सङ्घ लाग्नुपर्छ ।
राम्रो कामको कहिल्यै प्रशंसा र विश्लेषण नगर्ने, नराम्रो कामको मात्रै उजागर गरेर आर्थिक लाभ लिँदै आएका थापामाथि आरोप लगाएको छ । थापाले सार्वजनिक रूपमा सदस्यसचिवको आलोचना गर्ने र त्यसपछि बार्गेनिङ गर्दै आर्थिक लाभ लिने गरेको रहस्यको खुलासा भएको छ । लेखा शाखाका एक कर्मचारी भन्दै थिए, ‘थापाले विगत एक वर्षमा २५ पटक विराटनगरको मात्रै भ्रमण आदेश भरेका छन् ।’ जसबाट उनले परिषद्बाट लाखौँ रुपैयाँ लगेका छन् । अध्यक्षजस्तो मान्छे विराटनगरमा मात्र किन जान्छ, अन्य जिल्लामा किन जाँदैन ? त्यसबारे कर्मचारी सङ्घका पदाधिकारीले छानबिन गर्नुपर्ने बताए । कर्मचारीको हकहितका लागि अध्यक्ष बनेको हो कि आफ्नो स्वार्थसिद्ध गर्न त्यसको जवाफ थापाले दिनुपर्ने बताए । यो कुराको पुष्टि गर्न सम्बन्धित निकायमा सम्पर्क राख्दा यति नै पटक भनेर ठोकुवा नगरे पनि विराटनगरको भ्रमण आदेश भरेर थुप्रैपटक रकम लिएको खुलासा गरेको थियो । यसबाट पुष्टि हुन्छ कि थापाले अध्यक्ष पदको दुरुपयोग गर्दै कसरी आफ्नो भरणपोषण गरिरहेका छन् भनेर ।
यसरी नवीन उप्रेतीको आशीर्वादले अध्यक्ष बनेका पूर्वमन्त्री बलबहादुर केसीको चाकरीबाट पूर्वाञ्चलको क्षेत्रीय अध्यक्ष बनेका थापा अहिले आफूलाई पार्टी अध्यक्ष शेरबहादुर देउवाको निकट भन्दै उनीहरूकै आलोचना गर्दै हिँडिरहेका छन् । जुन थालमा खायो त्यसैमा प्वाल पार्दै आएका थापा आफ्नो फाइदाका लागि जहाँ पनि जान सक्ने र फाइदा लिने व्यक्तिको रूपमा देखापरेका छन् । यसको उदाहरण उनले खेलकुदमा खेलेको दोहोरो भूमिकाबाट पनि सोझै अनुमान लगाउन सकिन्छ । सङ्घलाई गुमराहमा राख्दै सङ्घकै आडमा मन्त्रालय र राखेपमा थापाले गरेको चलखेल यतिबेला चर्चाको विषय बनेको छ । मन्त्रालयका कुरा राखेप र राखेपका कुरा मन्त्रालयमा पु¥याउँदै दोहोरो लाभ लिइरहेका थापालाई अब कर्मचारी सङ्घले नाकमा कसरी रस्सी लगाउँछ त्यो प्रतीक्षाको विषय बनेको छ ।
प्रतिक्रिया