अनशनविरुद्ध अनशनको तयारी
स्वास्थ्य क्षेत्रमा सुधारका निम्ति विभिन्न माग राखी डा. गोविन्द केसी आमरण अनशनमा बस्न लाग्नुभएको खबर सार्वजनिक भएलगत्तै मनमोहन अस्पतालले विशेष साधारणसभा आयोजना गर्यो । सहकारी स्वास्थ्य संस्थाको रूपमा रहेको सो अस्पतालका दुई हजार चार सय सेयर सदस्यमध्ये करिब सात सय जनाले सोमबार (माघ ११ गते) आयोजित साधारणसभामा सहभागिता जनाएका थिए । डा. केसीविरुद्ध पर्चासमेत वितरण गरिएको सो सभामा स्त्रीरोग विशेषज्ञ डा. उमाकान्त भट्टराईले आफू गोविन्द केसीको अनशनका विरुद्ध अनशन बस्ने तयारीमा रहेको जानकारी गराएका थिए । त्यसरी केसीविरुद्ध अनशन बस्ने घोषणा हुँदा सहभागीले ताली बजाएर भट्टराईको समर्थन गरेका थिए ।
डा. भट्टराईलाई अनशनमा राख्नका लागि सोमबार साँझ मनमोहन अस्पतालका सेयर सदस्यहरू शिक्षण अस्पताल पनि पुगेका थिए । त्यहाँ पुगेपछि उनीहरूले डा. केसी आमरण अनशनमा बस्ने मिति सरेको थाहा पाएका थिए र जुन दिन केसी अनशनमा बस्नेछन् सोही दिनदेखि डा. भट्टराईले पनि केसीविरुद्ध शिक्षण अस्पतालमै अनशन बस्ने जानकारी अस्पताल प्रशासनलाई उनीहरूले गराएका छन् । यसले निकट भविष्यमा द्वन्द्व भूमिमा परिणत हुनसक्ने सम्भावना बढाएको छ । काठमाडौं उपत्यकाबाहिर मेडिकल कलेज विस्तार गर्ने उद्देश्यप्रेरित माग लिएर आमरण अनशनमा बस्दै आएका डा. गोविन्द केसीको आन्दोलनका कारण मनमोहन मेडिकल कलेजले स्वीकृति पाउन सकेको छैन । करिब दुई अर्ब ऋण रहेको सो अस्पतालले मेडिकल कलेज सञ्चालन गर्न नपाएका कारण करोडौँ घाटा व्यहोर्नु परिरहेको छ ।
प्रतिक्रिया