तातोपानी भन्सारको अवरोध खुलाउन छलफल शुरु

चीनबाट आयात गरिएका सामानबाट कोरोना सङ्क्रमण सर्न सक्ने भन्दै तातोपानी (सिन्धपालचोक)का स्थानीयवासीले अवरोध गरेपछि तातोपानी भन्सारले उद्योग वाणिज्य सङ्घ, नेपाल सीमापार व्यापार सङ्घ, बाह्रबिसे नगरपालिका र भोटेकोशी गाउँपालिकाका प्रमुखलगायतसँग छलफल शुरु गरेको छ ।



स्थानीयवासीले चीनबाट ल्याइएका स्याउ र लसुनबाट कोरोना सर्न सक्ने भन्दै भन्सारमा आइपुगेका ती गाडी कुनै हालतमा काठमाडौं जान नदिने बताउँदै भन्सारमा धर्ना दिएका थिए । अवरोधका बीच तातोपानी सुक्खा बन्दरगाहमा आइपुगेका स्याउ र लसुनका कन्टेनर मङ्गलबार (२३ वैशाख) काठमाडौं भित्र्याइएको छ ।

गत आइतबार चीनबाट नेपाल ल्याइएका लसुन र स्याउका सात कन्टेनर काठमाडौं पठाइएको भन्सार प्रमुख लालबहादुर खत्रीले पनि पुष्टि गरेका छन् । मङ्गलबार लसुनका तीन गाडी र स्याउका चार कन्टेनर सुरक्षाकर्मीको सहयोग लिएर काठमाडौं पठाइएपछि स्थानीयवासी असन्तुष्ट बनेका बताइन्छ ।

आगामी दिनमा कसरी अघि बढ्ने भन्ने सल्लाह गर्छौं भनेपछि कन्टेनरहरु सहज रूपमा जान दिएको तर थप सामानका लागि छलफल गर्नुपर्ने अवस्था रहेको सिन्धुपाल्चोक प्रजिअ खत्रीको भनाई छ । यसरी सल्लाह गरेर अघि बढ्ने भनी दिइएको बचनअनुसार सर्वपक्षीय छलफल शुरु भएको बुझिएको छ ।

प्रतिक्रिया